Serekkomarê Tirkîya Erdogan do 5ê adare de seba babeta Îdlîbî şoro Moskova. Labelê zîyaretê Moskova ra verî NATOyî ra hetkarîye waşte.

Dima ke Îdlîb de alozîye bîye zêdêr ame parekerdene ke Erdogan û Putîn 5ê adare de Moskova de do bêrê têhet.

Vervatoxê Kremlînî Dmitry Peskovî derheqê pêvînayîşî de eşkerayîyêke dabi û vatbi ke 5ê adare de planêko cîya yê Putînî esto û seba pêvînayîşê Erdoganî amadekarîye çin a.

Erdogan zîyaretî ra verî NATOyî ra hetkarîye waşte. Dima ke Erdoganî telefon reyde Serekkomarê Fransa Macronî dir qisey kerd Serekîya Îrtîbatî ya Erdoganî eşkerayîyêke daye û da zaneyene ke ey NATOyî ra hetkarîye waşte.

Eşkerayîye de wina ame vatene: ''Erdoganî ard ziwan ke ê wazenê ke paştdayîşê NATOyî têna bi vatişî ney bi çalakîye zî bivînê.''

Erdoganî bi rayîrê telefonî Serekê DYA Trumpî reyde zî derheqê Sûrîye û babeta Patrîotî de qisey kerdbi.

Akarî name da îşxalkerîye

Wezîrê Pawitişî yê Tirkî Hulusî Akarî zî derheqê şerê Îdlîbî de eşkerayîyêke daye û nameyêk da îşxalê Îdlîbî. Akarî vat: ''Têgêrayîşê Mertalê Wisarî yo ke hêrişê 27ê sibate ra nata bi hawayêkê serkewteyî dewam keno.''

Akarî îfade kerd ke ê nêwazenê vera Rûsya de vinderê û vat: ''Armancê ma çin o ke ma vera Rûsya de bibê. Ma Rûsya ra pawenê ke hêrişê rejîmî bida vindertene û rejîm bianco sînorê peymana Soçî.''

Hetê bînî ra Wezaretê Pawitişî yê Rûsya derheqê teyara de ke Îdlîb de ameye warvistene eşkerayîyêke daye û eşkera kerd ke îdîayê ke vanê 'Îdlîb de teyaraya Su-24î ameye warvistene' rast nîyê.