Vervatoxê Merkezê Koordînasyon û Teqîbê Weçînayîşan ê HDPyî Mehmet Ruştu Tîryakîyî derheqê bêusûlîyanê weçînayîşî de vizêr şan reya diyîne Merkezê Pêroyî yê HDPyî de eşkerayîyêke daye. Tîryakîyî pare kerd ke înan hewce dî ke eşkerayîya diyîne bidê.

Tîryakîyî îfade kerd ke  xeylêk sindoqan de doneyê şaşî ameyê qeydkerdene û vat: ''Sîstemê SÎPPORTî de zî yeno dîyene ke doneyê şaşî ameyê tomarkerdene. Ma îtîrazê xo kerd. Tay doneyê ma heta nika ameyê raştkerdene. Tay şaristanan de netîceya ke tesîrê hûmara wekîlan bikera çin a. Xebatê ma dewam kenê. Her merkez û qeza de embazê ma yê avûkatî doneyan anê pêser. Ma kamca de şaşîye vînenê, îtîrazê ci kenê. Bi nê hawayî doneyî yenê raştkerdene. Wa şarê ma zerrîrehet bibo, ma xebitîyenê. Ma do 193 hezar sindoqan de doneyanê şaşan raşt bikerê û wayîrê rayanê xo vejîyê.''