Hemserekê Pêroyî ya DEM Partî Tulaye Hatimogullari meclîs de kombîyayîşê grûba xo de rojdem erjna.

Tulaye Hatimogullari derheqê rewşa weşîya Endamê Heyetê Îmralyî Sirri Sureyya Onderî de vat ''Ma hêvîya xo vînî nêkerd, ma do hêvîya xo vîrî mekerê.''

Tulaye Hatimogullari vengdayîşê Rayber Apoyî yê 27ê sibate vistvîrî û nê vatî: ''No vengdayîşê xurtkerdişê kede, haştîye û demokrasîyî yo. haştîye semedê kedkaran hendê nanî muhîm o.Wextanê haştîye de têkoşînê kede dahîna lez ser kewno. Komelo demokratîk temînatê cuye yê karkeran û bindestan o. Ma veng danê heme kedkaran û şaran  ke wa semedê kede, haştîye û azadîye  1ê Gulane de vejîyê waran.''

Hatimogullari konferansê Rojawanî yê 27ê nîsane selam kerd û wina vat: ''Ma hêvî kenê ke qerarê ke konferans de ameyî girewtene sere se semedê kurdan semedê şaranê Sûrîye û Rojhelatê Mîyanênî haştîye bîyarî û bibê wesîleya xeyrî.''

Tulaye Hatimogullari nê vatî: ''Bêrê ma haştîye  bi huqûqî ronê, bi demokrasîyî ma biheybet bikerê û ameyoxê nê welatî rê dîyarî bikerê. Heyetê ma hewteyo ravîyarte Wezîrîya Edelatî de pêvînayîşêko muhîm kerd. A roje rê dima tim ma rê telefonî yenê, şar semedê paketê hukmî perseno. Komel nê paweno. Heyetê ma nê pêvînîyîş de waştişê şarî eşkera û zelal ard ziwan.

Sere de azadîya Birêz Abdullah Ocalanî gerek hinî gamê ke hewce kenê bêrê eştene. Top hinî warê îqtîdarî de ya.  Berpirsîyarî hinî înan de ya. Ma pawenê ke wa berpirsîyarîya xo bigîrê xo ser. Semedê çareserîya demokratîke gerek îradeyo sîyasî bêro ramojnayene. Gerek îqtîdar şarî goştarî bikero û semedê haştîye gama pête bierzo. Ma sey DEM Partî semedê serkewtişê prosesê haştîye û çareserî bîyî seferber . Ma wazenê wa hinî dejî biqedîyê û çew heseran war mekero.''