Hemsereka Pêroyî ya DEM Partî Tulaye Hatîmogullari heyetê xo reyde qezayê Bazarcix û Dîgorî zîyaret kerd û tewra akerdişê buroyanê weçînayîşan bîye. Serekwekîla Grûba DEM Partî Gulîstane Kiliç Koçyîgît, Wekîlê DEM Partî Yilmaz Hun, Namzedê Şaredarîya Qersî Arzuye Savaş Derman û Kenan Karahanci zî mîyanê heyetî de bîyî.

Tulaye Hatîmogullari bernameyê Bazarcixî de xîtabê şarî kerd û ard ziwan ke DEM Partî hêvîya cinî û ciwanan a. Hemsereke pare kerd ke ê do pêro keyeyan ra bigêrê û qalê ci bikerê ke çira şar ganî raya bido înan.

Heyetî dima Dîgor zîyaret kerd. Şarî bi sloganan dekewtişê qeza de heyet pêşwazî kerd. Namzedê Şaredarîya Dîgorî Ulkere Ozaditti û Adem Oyman zî heyetî reyde bîyî.

Tulaye Hatîmogullari bername de qisey kerd û bale anet qirkerdişê Dîgorî ser. Tulaye Hatîmogullari da zanayene ke ê do qetî rayîr nêdê qirkerdişanê winayênan. Tulaye Hatîmogullari bale ante tecrîdê vera Rayberê Şarê Kurdî Abdullah Ocalanî ser.

Tulaye Hatîmogullari dîyar kerd ke AKP-MHP dişmenê şaran, sîstemê hemserekîye û cinîyan o. Tulaye Hatîmogullari vat: ''Ma do şaredarîyanê xo de qetîyen rayîr nêdê ferasetê dişmenîye. Ma do tim cinîyan rê paştî bidê, şaredarîyanê xo bi ziwanê dayîke xizmetan bidê. Ma do newe ra bi hawayêkê demokratîkî şaristanan awan bikerê.''

Heyet Dîgorî ra dima do derbazê Qaxizmanî bibo.