Dimayê vengdayîşê rayberê PKK’yî Abdullah Ocalanî tepişteyan grevê vêşanîye û rojeyê mergî qedîna û nêweşxaneyî rê ameyî sewqkerdene, kontrolê înan ê weşîye hewna dewam kenê. Parlamentera serrewextê verênî yê Partîya Şaran a Demokratîke (HDP) ya Colemêrgî Selma Irmake ya ke Zîndanê Kandira de yena girewtene û pîya bi hemsereka pêroyî ya Partîya Herêmanê Demokratîkan (DBP) Sebahat Tûncele 18 kesî vizêr saetanê şewe de ameyî berdene bi Nêweşxaneyê Dewlete yê Seka yê Kocaelî. Parlamenterê HDP’yî yê Kocaelî Omer Farûk Gergerlîoglû şi serdana tepişteyanê ke ameyî berdene nêweşxane.

Omer Farûk Gergerlîoglû yê HDP’yijî vat halê weşîye yê Sebahat Tûncele û Selma Irmake rind asayo labelê înan kîlo dayo û vatişanê xo rê nê îlawe kerdî: “Ez şîya Nêweşxaneyê Dewlete yê Seka. Mi Selma û Sebahate dir pêvînayîş kerd, halê înan rind bi labelê bîbî zihîf.”

Tepişteyê ke Sêwrege de bîyî zî ameyî sewqkerdene

Zîndanê Sêwrege yê Girewteyî yê Tîpê T’yî de 6 tepişteyê ke 5’ê Çele ra nata grevê vêşanîye yê bêdem û bêagêrayîşî de bî, vizêr ra tepîya çalakîya xo qedînaye û Nêweşxaneyê Dewlete yê Sêwrege de yenê tedawîkerdene. Tepişteyê ke yenê tedawîkerdene ra êyê ke nameyê înan ame zanayene nê yê: Sûnay Yamane, Sozdar Çîçeke, Ayten Tîkîte û Serhat Yilmaz.

Hetêna ra avûkatê ke endamê Komîsyonê Zîndanî yê ÎHD’yî yê, ard ziwan ke Zîndanê Sêwrege yê Tîpê T’yî de pêro pîya 26 tepişteyî grevê vêşanîye yê bêdem û bêagêrayîşî de yê, nînan ra êyê ke halê înan krîtîk bîyo 6 kesî bîyê û ameyê berdene bi nêweşxane. Yeno pawitene ke ewro heme tepişteyî nêweşxaneyî rê bêrê sewqkerdene.