Hetkarê Hemserekanê HEDEPî yê Berpirsîyarê Komîsyonê Huqûq û Heqanê Merdiman Ozturk Turkdoganî derheqê xebatanê qanûnê bingeyî yê neweyî de ANFyî rê qisey kerd.

Ozturk Turkdoganî vist vîrî ke meseleya esase ya Tirkîya meseleya kurdan a û na mesele bi sîstemê dewleta merkezîye çareser nêbena. Turkdoganî vat: ''Meseleya kurdan bi nîmuneya Qanûnê Bingeyî yê 1921î, bi sîstemê îdareyanê xoseran-otonoman çareser bena. Ma sîstemê dewleta îdareyanê xoseran wazenê û na babete de ganî Qanûno Bingeyî yê 1921î bêro esaskerdene. Ma sey HEDEPî xîret kenê ke Qanûno Bingeyî yo newe nerm û şenik bibo. Ma nîqaşanê nê prosesî de xora do tim meseleya kurdan bîyarê rojdem. Ma azadîya îfadeyan, azadîya çapemenîye, têdûştîya seba elewîyan, rewşa zîndanan, refahê ekonomîkî ûsn ser o qisey bikerê.''

Turkdoganî bale ante ser ke sey HEDEPî verkarê înan ê serê qanûnê bingeyî yê neweyî amade yo û vat: ''Qanûno Bingeyî ganî hêverî rûmetê merdiman, têdûştîye, demokrasî û heqanê bingeyînan esas bigêro. Ganî Tirkîya verê xo bida averwazîye. Ganî dewlete komel de haştî bikera û meseleyan û xeletîyan de têrî bêra. Prosesê viraştişê qanûnê bingeyî prosesê têrîameyîşî yo zî.

Dewleta tirke 1921 de heqê şaran û otonomî qebul kerdbî. Hînî ganî înkarkerdiş biqedo. Ma vanê ke eşkenê bi qanûnê bingeyî yê neweyî meseleya kurdan çareser bikerê, heqanê şaran bigêrê binê garantî, heqanê elewîyan bîyarê ca û babeta têdûştîya cînsîyetan de destkewteyanê girîngan bivisnê destî.''