Partîya Demokrasîyî û Têdûştîye ya Şaran (DEM Partî) vera qerarê newekerdiş weçînayîşê  Curnê Reş  û Xelfetî bi eşkerayîyêke nêrazîbîyayîş mojna ra.

Çalakîye qezaya Halîlîye ya Riha de ameye kerdene. Hemsereka Pêroyî ya DBPyî Çigdeme Kiliçgun Uçar, Vervatoxa Meclîsê Cinîyan ê DEM Partî Halide Turkoglu, wekîlê partîye Salîha Aydeniz, Sinan Çîftyurek, Vezir Parlak, hemşaredarê Curnê Reş û Xelfetî, temsîlkarê rêxistinanê demokratîkan yê bajarî û xeylêk kesî tewrê çalakîye bîyî.

Çigdeme Kiliçgun Uçar vat: ''Weçînayîş de şarî ser kewtî, AKP û dewleta xorî bin kewtî. Şirnex, Bedlîs û Qers de zî netîceya weçînayîşî meşrû nîya. Teberê bajarî ra weçinîtoxê sexteyî ardî û vanê qey ê ser kewtî. Îtîrazê AKPyî yê semedê weçînayîşî qebul benê, la ê ma qebûl nêbenê. Curnê Reş û Xelfetî de şarî cewabo tewr rind dayo tecrîdî.  Dewlete senî ke Wan de vera îradeyê şarî bin kewte ma do nê  wird qezayan de zî bikerê. Şar polîtîkayanê şerî nêwazeno. Sîyaseto demokratîk hewce keno. Coka AKP bin kewt.

AKP ganî nê ra ders vejo la o herinda nê de masa ser o vano ez senî eşkena cayanê bînan xesp bikerê. Yeno waştene ke heme erjê ma yê ke îqtîdar nêvînayîşî ra yeno, newera bi dizdiye bidîyê AKPyî. Şarî mazbata daya. Ma semedê Curnê Reş û Xelfetî veng danê heme muxalefetî , ma Wan de ser kewtî, ma do Curnê Reş, Xelfetî, Şirnex, Bedlîs û Qers de zî ser bikewê. Nê cayî yê Kurdan ê. Ma semedê paştdayîşî ven gdana heme rêxistinanê demokratîkan.''

Çalakîye bi slogananê "Bijî iradeya gelê Kurd" û  "Ma do bi têkoşînî ser bikewê " qedîyaye. Heyetî Curnê Reş û Xelfetî zîyaret kerdî.