Wekîla HEDEPî Newroze Uysal Aslan bale ante bira MHME ya 'heqê hêvîye' ser û pare kerd ke dewlete bi xespkerdişê 'heqê hêvîye' yê Rayberê Şarê Kurdî Ocalanî azadîya şarê kurdî kena hedef.
Rayberê Şarê Kurdî Abdullah Ocalanî yo ke 25 serrî yo Îmrali de sey esîrî tepişîyeno, 30 mengan ra nata tira xeberêke zî nêna girewtene. Rixmo ke Mehkemeya Heqanê Merdiman a Ewropa (MHME) derheqê Abdullah Ocalanî de waşt ke wa Tirkîya 'heqê hêvîye' bîyara ca bire nêna caardene.
Wekîla Partîya Têdûştîye û Demokrasîyî ya Şaran (HEDEP) û avûkata Rayberê Şarê Kurdî ya verêne Newroze Uysal Aslan derheqê polîtîkaya tecrîdî û heqê hêvîye de ANFyî rê qisey kerd.
Newroze Uysal hêverî wina pênaseya 'heqê hêvîye' kerd: ''Huqûq de heqê hêvîye yeno manaya ke tepişteyan rê îmkanê veradayîşî dîyeno. Dima ke dinya de cezaya îdamî wedarîyabî cezaya mubedeya girankerde herinda ci de ameye. Tirkîya de 14ê temmuza 2004î de cezaya îdamî bi cezaya mubede ameye vurnayene. Tirkîya de nîqaşê serê 'heqê hêvîye' zî hêverî pê bira MHME ya serê Birêz Ocalanî dest pêkerd. MHME 18ê adara 2014î de vat ke cezaya zîndanî ya heta mergî binpaykerdişê 'heqê hêvîye' yo. Esasê heqê hêvîye 'pawitişê hûrmetê merdimatîye û rûmetê merdimatîye' yo. Dewleta tirke seba ke tersena ke Birêz Ocalan rojêke do azad bibo na bire canêana û peymananê mîyanneteweyîyan binpay kena.
Tirkîya de dima ke cezaya îdamî vurîyaye Meclîs de bire dîyaye ke seba ke Birêz Ocalan û tepişteyê sîyasîyî vera nêdîyê cezaya mubedeya girankerde wa bêra caardene. Tirkîya bi nê hawayî waşt ke Birêz Ocalanî bi hawayêkê qanûnî asteng bikera. Îqtîdaro sîyasî herinda ke bira heqê hêvîye bîyaro ca her roje tecrîdî giranêr keno.
Komployo Mîyanneteweyî, cezaya îdamî, şertê Îmraliyî, vurîyayîşê îdamî yê bi muebedî nê pêro parçeyê sîstemê Îmraliyî yê. Sîstemê Îmraliyî zî bingeyê polîtîkaya çaresernêkerdişê meseleya kurdan de ame ronayene. Birêz Ocalan tewirê xo yê haştîyaneyî ra yeno esîrkerdene. Dewleta tirke bi xespkerdişê heqê hêvîye azadîya şarê kurdî asteng kena. Bi sîstemê Îmraliyî şarê kurdî û şarê Rojhelatê Mîyanênî yenê tecrîdkerdene. Bi xespkerdişê heqê hêvîye azadîya Birêz Ocalanî û azadîya şarê kurdî yenê xespkerdene.
Hetê bînî ra eke tewiro ke Birêz Ocalanî vera sîstemê Îmraliyî mojneno, bêro caardene hem heqê hêvîye warê huqûqî de hem zî azadîya şaran do bêrê caardene''
