Partîya Çep a Keske xeylêk şaristananê Vakurê Kurdîstanî û Tirkîya de bi coşêkê pîlî xebatanê xo yê weçînayîşî rê dewam kena. Şar bi eleqeyêkê pîlî partîye pêşwazî keno.

Erzirom

Çarçewa turê weçînayîşî yê Serhedî de Partîya Çep a Keske bi beşdarîya Hemvervatoxa xo Çîgdeme Kiliçgun Uçar, Hemserekê DBPyî Keskîn Bayindir, Hemsereka Pêroyî ya ESPyî Ozleme Gumuştaş namzetanê wekîlîye û xeylêk kesan qezaya Qereyazî ya Erziromî de şarî reyde ameye têkişt. Şarî pê konvoyan partîye pêşwazî kerd. Dima buroyê weçînayîşî akerd. Namzetê wekîlîye Sezaî Temellî, Hemserekê DBPyî Bayindir û Hemvervatoxe Uçare tîya de qisey kerd. Înan ard ziwan ke şar îqtîdarî rê vano 'hînî bes o' û weçînayîşan de nê îqtîdarê AKP-MHPyî do bişawo. 

Çarçewa turî de heyet dima verê xo da qezaya Qereçobanî. Konvoyê weçînayîşî hetê doman û ciwanan ra ame pêşwazîkerdene. Dima heyetî buroyê weçînayîşî akerd. Temellîyî û Bayindirî akerdişê buroyî de qisey kerd û pare kerd ke ê do îradeyê şarî weçînayîşan de apey bigêrê. Uçare zî bale ante ser ke îqtîdar qala çareserîye keno la ey bi xo masaya çareserîye rijnabî û mutabeqatê Ocalanî qebul nêkerdbi.

Heyetê turî dima ver bi qezaya Gimgimî ya Mûşî kewt rayîr.

Amed

Qezaya Sûrî de, bi beşdarîya namzetanê wekîlîye, îdarekaranê HDP û DBP û Partîya Çep a Keske buroyê weçînayîşî ame akerdene. Hemserekê DBPyî yê Amedî Hayrettîn Altunî akerdiş de îfade kerd ke mefteyê demokrasî yê welatî destê kurdan de yo. Namzetan Adalete Kaya û Azad Barişî zî vat ke eke Amed weçînayîşan de ser bikewo, welat pêro do ser bikewo.

Taxa Saricakî ya qezaya Gêlî de zî bi beşdarîya namzetanê wekîlîye buroyê weçînayîşî ame akerdene. Qiseykerdişê namzet Serhat Erenî ra dima buro bi sloganê Jin, Jiyan, Azadî ame akerdene.

Xarpêt

Rêxistina Partîya Çep a Keske, bi beşdarîya namzetanê xo derheqê asayîşê weçînayîşan de kombîyayîşê agahdarkerdişî viraşt. Endamê Komîsyonê Weçînayîşî yê HDPyî Mustafa Akengînî kombîyayîş de qisey kerd û bale ante ser ke wezîfedarî ganî sindoqan terk mekerê, muşahîdî rew ra ganî şorê cayanê xo û bêusûlîyan qeyd bikerê.

Wan

Qezaya Tûşba de taxa Abdurrahman Gazîyî de buroyê weçînayîşî bi beşdarîya namzetanê Partîya Çep a Keske ame akerdene. Hemsereka HDPyî ya Wanî Handane Karakoyun aktîvîte de vat ke ê do 14ê gulane de rejîmê qesre bişawê. Qiseykerdişanê namzetan ra dima Mayanê Haştîye buro akerd û şarî govende girewte.

Dîlok

Taxa Hacibabayî de û qezaya Şahînbeyî de  namzetanê Partîya Çep a Keske esnafî zîyaret kerdî û vilawekî vila kerdî. Girseyî bi eleqeyêkê pîlî namzetî pêşwazî kerdî û sloganî vatî.

Adana 

Rêxistinîya Partîya Çep a Keske namzetanê xo reyde qezaya Seyhanî de buroyê weçînayîşî akerd. Şarî bi tîlîlî û slogananê sey "Bijî Serok Apo", "Jin, Jiyan, Azadî"paştî daye partîye. 

 Sêrt

Partîya Çep a Keske çarçewa turê weçînayîşî yê Botanî de qezaya Dihî ya Sêrtî de şarî reyde ameye têhet. Hemserekê KCDyî Berdan Ozturk, Hemvervatoxê Partîya Çep a Keske Îbrahîm Akin, Hemsereka DBPyî Salîha Aydenîz û Serekê EHPyî Hakan Ozturk tewrê turî bîyî. Heyetî Dih de buroyê weçînayîşî akerd. Qiseykerdişan de ame vatene ke sere de meseleya şarê kurdî Partîya Çep a Keske do pêro meseleyanê şarî çareser bikera. Qiseykerdişan ra dima heyetî esnafî zîyaret kerdî.

Hetê bînî ra xeylêk cayanê Îstanbul, Mersîn, Anqara, Kocaelî û Antalya de zî buroyê weçînayîşî ameyî kerdene û heyetanê Partîya Çep a Keske turanê xo rê bi beşdaranê namzetanê wekîlîye dewam kerd.