Tirkîya û Vakurê Kurdîstanî de nêweşîya gerrî ra 30 zêdîyayî. Dermanê nêweşîye hetê SGKyî ra nênê dayene. Nêweşîye bi taybetî herêmanê erdlerzî de yena dîyene.

Hemvervatoxê Komîsyonê Polîtîkayanê Weşîye yê HEDEPî Prof. Dr. Onur Hamzaogluyî derheqê babete de ANFyî rê qisey kerd.

Hamzaogluyî ard ziwan ke nêweşîya gerrî nêweşîya parazîtan a û seba ke nêweşîye nêvurîya janî tedbîrî bêrê girewtene. Hamzaogluyî vat: ''Gerrveetiş nêweşîya komanê janî ya. Seba ke na nêweşîye vila nêba ganî merdimî xo hol bipawê. Cayanê qerebalixan de gerr bi lezî vila beno. Ganî kesê ke gerrî vejenê herroje xo bişuwê, cilanê xo bivurnê.''

Hamzaogluyî bale ante ser ke şertê herêmanê erdlerzî kenê ke gerr bi lezî vila bibê û vat: ''Konteynirê mexdûranê erdlerzî îzolekerde nîyê, awa werdiş û şuxilnayîşî qîm nêkena. Seba ke na nêweşîye herêma erdlerzî de hîna zaf vila nêba ganî şert û mercê cuye bêrê holkerdene. Ganî SGK dermananê gerrî bigêrê binê sîgorta. Ganî merdimê ke gerrî vejenê bêrê tesbîtkerdene û nînan rê dermanî bêrê dayene.''