Bi wesîleya serrgêra Komployê 9ê Teşrîna Verên a vera Rayberê Şarê Kurdî Abdullah Ocalanî Îstanbul de eşkerayîye ameye dayene.

HDP, Partîya Çep a Keske, HDP, TJA, DBP, Meclîsê Dayîkanê Haştîye û xeylêk îdarekarê dezgehanê sîvîlan û partîyanê sîyasîyan tewrê kombîyayîşî bîyî. Heyata kombîyayîşî de panpanrta “Heta şiknayîşê tecrîdî do rayraşîyayîşê ma yê azadîye dewam bikero”  ame daliqnayene.

Hemsereka HDPyî ya Îstanbulî Ilknure Birola ke verê kombîyayîşî qisey kerd, vat, “Rolo manevî yê Birêz Ocalanî yeno zanayene. Eke Tirkîya wazena bibo welatêko demokratîk û ferah ganî cade tecrîdê serê Birêz Ocalanî wedaro.”

Dima ra metnê çapemenîye hetê Vervatoxê HDKyî û Wekîlê Partîya Çep a Keske Cengîz Çîçekî ra ame wendene.

Çîçekî ard ziwan ke komplo bi metodanê cîya cîyayan dewam keno û vat: "Îmrali de huqûq werte ra ameyo wedartene. Seba ke Rayberê Şarê Kurdî ra xebere nîna girewtene şar qesawet keno hêrsbîyaye yo. Tecrîdê teberê merdimîye yo ke serê Birêz Ocalanî de yeno caardene cayê ci pêkerdişanê mîyanneteweyî de çîn o ke hetê dewleta tirkera ameyî îmzakerdene. Êyê ke dişmenîya şaran û bindestan kenê bewlî yê. Ma reyna vanê ê ke tecrîdê Îmraliyî xorî kenê, welatî her hetî ra fînenê tengayî. Heta ke Birêz Ocalan azad mebo ne kurdî benê azad û ne zî şarê Tirkîya tengayîye ra xelisîyenê. Coka têkoşînê vera tecrîdî têkoşînê azadîye yê kurdan û tekoşînê demokrasîyî yê şaranê Tirkîya yo.

Heta şiknayîşê tecrîdî do tim rîyê ma ver bi Gemlikî bo. Ma do her herême ra, çar hetan ra ma do ver bi Gemlikî rayra şirê. Ma do planê rayraşîyayîşî peyra bare bikerê.”