Koordînasyonê Tevgerê Ciwananê Şorişgêran (DGH) û Tevgerê Cinîyê Ciwanî yê Şorişgêran (DGKH) bi îzehetêko nuştekî da zanayene ke înan vera tecrîdo ke Rayberê Şarê Kurdî Abdullah Ocalanî ser o esto de xeylê bajaran de çalakîyî viraştî.
Îzehetê her di rêxistinanê ciwanan de ameyo vatene ke vera tecrîdo ke Ocalanî ser o esto û qerarê redkerdişî yê Mehkemeya Heqê Merdiman ya Ewropa (MHME) de bi desan çalakîyê veşnayîşî ameyî kerdene.
Rêxistinanê ciwanan îzehetê xo de qerarê MHME şermizar kerdo û wina vato: “Qeraro ke hetê MHME ra ameyo dayene, nîşan dano ke dagîrkeran pîya no qerar dayo. Ma nê qerarî şermizar kenî û ma keyeyê Umît Acarî ke Almanya de xo veşna rê serweşîye wazenî.”
Rêxistinan îzehet de veng dayo her kesê ke hetgirê demokrasî û azadîye yî û wina vato: “Wa ti kes vera nê wehşetê dewleta tirkî de bêveng nêmano. Ma fedaîyê şarê xo yî û bêxera cuya azade çîyêk qebul nêkenî. Ewro roja pawitişê erdê xo yo. Ewro roja wedarnayîşê tecrîdî yo. Çîyê ke seba şorişî yenî kerdene ma resnenî serkewtişî. Ma fedaîyê Rayber Apoyî do cuye bi dewleta tirk û hemkaranê aye rê teng bikerî. Ganî ciwanî heme ca bikerî cayê serewedaritişî.”
5 BAJARAN DE ÇALAKÎYÎ
Îzehet de ca dîyayo bîlançoya çalakîyanê ciwanan ke mabênê 29ê teşrîna verêna 2017 û 4ê teşrîna verêna 2018î de ameyî viraştene. Bîlanço wina ya:
“SAMSÛN: 29ê êlule de taxa 19 Mayisî de şewe saete 2.30 de yewîya ma ya hefgirewtişî ya Şehîd Baran Mawayî depoyê findiqan yê Mehmet Akça û lajanê ci, veşnayo. Netîceyê veşnayîşî de 40 ton findiqî bîyî wele.
STENBOL: 30ê êlule de hetê yewîya ma ya heygirewtişî ya Şehîd Atakan Mahîrî ra taxa Îstîklalî de wesayîtêk ameyo veşnayene. Reyna eynî yewîya ma Umranîye de cayê viraştişê sehpayan yê 3 qatinî veşnayo û zirarêko gird bîyo.
ÎZMÎR: Yewîya ma ya heyfgirewtişî ya Şehîd Baran Mawayî dikanê zucacîye ke aydê hemkarê dewlete yê bi nameyê A.Y yo, veşnayo. Şewat vilayê 3 dikanan bîyo û zirarêko gird bîyo.
MÛŞ: 3ê teşrîna verêne de qezaya Haskoyî ya Mûşî de depoyê lastîkan hetê yewîya ma ya heyfgirewtişî ya Şehîd Atakan Mahîrî ra ameyo veşnayene. Walîyê Mûşî Azîz Yildirim zî tede heyetêk ameyo cayê hedîseyî û zirarêko gird bîyo.
GURGUM: Yewîya Şehîd Baran Mawayî sîteyê Terzîyan de depoyê pemeyî yê R.Eyê hemkarî veşnayo. Şewatî ra dima depo bi temamî bîyo wele.”
Seke yeno zanayene Koordînasyonê DGH Û DGKHyî aşma tebax û êlule de zî aşkere kerdbî ke ê 20 zêde çalakîyî viraştî û bi desan hemkaran ceza kerdî.
