Zîndanê Patnosî ra Çekdar Odungîtî pare kerd ke her roje erzîyeno koxûşanê înan ser, tepişteyê nêweşî sewqê nêweşxaneyan nênê kerdene. Hetê bînî ra Cemal Tanhano ke erey vera dîyabi, nêeşkeno qisey bikero.
Tepişteyê Zîndanê Patnosî Çekdar Odungîtî bi telefonî keyeyê xo de qisey kerd û qala binpaykerdişê heqanê înan kerde. Wata Odungîtî Hêvîdare Odungît da zanayene ke kekê ci vato ke gardîyanî her roje erzenê koxûşanê înan ser, hacetanê tepişteyan serûbin kenê.
Hêvîdare ard ziwan ke kekê ci wina vato: ''Zîndanê Patnosî de tepişteyî nênê berdene bi nêweşxaneyî. Eke bêrê berdene zî nînan rê zorbazîye yena kerdene. Coka çew nêwazeno şoro nêweşxane.''
Hêvîdare Odungît îfade kerd ke ganî her kes bibo vengê tepişteyan û paştî bido nînan.
Hetê bînî ra Cemal Tanhan (68) 30 serran rixmê nêweşîyanê xo yê giranan zî vera nêdîyabî û dima ke felç bibi tehlîye bibi. Kênaya Tanhanî Ayşe Tanhana ke hetê babîyê xo de manena eşkera kerd ke rewşa babîyê ey giran a û vat: ''Babîyê mi nêeşkeno qisey bikero.''
