Tirkîya de zî hûmara kesanê ke pê vîrusê Korona kewtî bîye 47 kesî. Temamîya welatî de pêro kulub, bar, dîskotekî vizêrî ra nata girewte yê. Wekîla HDPyî û aktîvîsta TJA Dr. Semra Guzel derheqê tebdîranê vera vîrusê Korona de qisey kerd.

Guzele  vat: ''Şitişê destan, xodûrvistişê temasê yewbînan, kesanê ke kixenî û pişenî ra dûrvindertiş girîng ê. Eke merdim nêweş bibo ganî maske bixebitno û şoro nêweşxane. Rêxistina Weşîye ya Dinya no vîrus sey pandemî îlan kerd ke zaf lez vila beno. Ganî sînoran de tebdîrî baş bêrê girewtene. Her çiqas berê sînorî girewte yê zî ma zanenê ke hema zî multecîyî yenê.

Eke merdimî şik kenê wa testan bikerê. Nika nê testan Tirkîya de 25 nêweşxaneyan de yenê kerdene û têna nimûne yeno girewtene. Tirkîya de 6 labaratuwar estê. Nêweşxaneyê ke tede nimûne yeno girewtene ganî înan zêdê bikerê û eynî wextî hûmara laboratuwaran zî zêdêr bo.

Eke ma reya verêne tebdîrî bigirewtêne xora wina nêbîyêne. Cayê komelkî sey dibistanî, zanîngehî, kargehî zaf bitehlûke yê. Ganî merdimî nê cayan ra dûrî vinderê.Tepişteyî, multecîyî zî binê rîskêkê pîlî de yê. Ganî bi taybetî tepişteyê nêweşî û domanî cade bêrê veradayene. Ganî şaredarîyî girîngîye bidê karê dezenfekte Ganî otobusî, dibistanî, kargehî, parkî ûsn. her roje bêrê pakîkerdene. ''