Kampanyaya îmzayana ke semedê wedaritişê qedexeyê serê PKKyî yena rayraberdene vila bena. Vizêr xeylêk bajaranê Ewropa de standê îmzayan ameyî ronayene.

Paytextê Londonî yê Îngîlîstanî de çarçewaya Hemleya “Werin Cenga Azadiyê” de hetê ciwananê kurdan ra standê îmzayan ame akerdene. Çalakîye de vilawekî ameyî vilakerdene û veng dîya welatanê Ewropa ke wa qedexeyî wedarî.

Bajarê Lleida yê Katalonya de seba ke PKK 'lîsteya terorî' ra bêro vetene xebatê îmzayan dîyayî destpêkerdene. Ciwananê enternasyonalîstan kuçeyêkê sixletî de îmzayî arêdayî.

Bajarê Hannoverî yê Almanya de serkêşîya Meclîsê Cinîyan ê Ronahî de standê îmzayan ame akerdene. Çalakîye de ame vatene ke PKK şarê kurdî temsîl keno û şar nîno qedexekerdene.