3ê temmuze dewa Karahîsarî ya qezaya Serayî ya Wanî de leşker û qoricîyan wesayîtêkê multecîyî kiriştêne ser o guleyî varnayîbî. Netîceya hêrişî de domanêk amebi qetilkerdene û 12 kesî birîndar bîyî.

Baroyê Wanî, OHD, KESK,  Serhat Goç Derî ra heyetêk şîyî cayê qewimîyayîşî û raporêk amade kerd. Heyetê vizêr bi eşkerayîya çapemenîye raporê xo eşkera kerd.

Endama OHDyî Mehtap Işik îfadeyê şahîdanê ke rapor de yê wendî. Goreyê raporî şahîdanê qewimîyayîşî vat: ''Nizdê 70-80 rey tifîngî teqayî. Dima veng birya û reyna 70-80 rey vengê tifingan ame. Gama ke ma şîyî warê qewimîyayîş doman hema weş bi. Leşkeran mudaxale nêkerd û dormeyê ci girewt. di saatî ma nêeşkayî  çîyêk bikerê.  Dima ra dewijan bi îmkananê xo mudaxale kerd. Kuçeyo ke wesayît kewt de xora korkuçebi, nêeşkayêne tira vejîyo. Leşker û qoricî zî nê zanî. Coka ganî înan guleyî meeştêne wesayîtî.''

Rapor de wina ame vatene : ''Walîtîya Wanî vato 'xeletîye ra guleyî îsabet kerdo' la no raşt nîyo. Wesayaît ameyo hedefgirewtene. Gama ke multecîyî wesayîtî ra ameyî war zî înan ser o guleyî ameyî varnayene. Coka merde û birîndarî est ê. Hêzanê dewlete destûr nêda ke heyetê ma nêweşxane de birîndaran bivîno. Rewşêka şikdare est a. Cipersayîşo raşt nîno kerdene. îfadeyê şahîdan, dîmenî, gonîya ke cayê qewimîyayîşî de rişîyaya heme mojnenê ke no multecîyî xeletîye ra nê, cara ameyî hedefkerdene.''