Seke yeno zanayene Ajansê Xeberan yê Firatî (ANF) ke bi xeylê ziwanan xizmetê şarê xo keno, 15ê êlule de bi kirmanckî zî dest bi xizmetî kerd. Abîyayîşê beşê kirmanckî xeylê kesan de kêfweşîye viraşto.

Nuştox Azad Araratî abîyayîşê beşê kirmanckî yê ANFyî ser o va ‘Tevgerê Azadîye cuya kurdan de xeylê vurnayîşî ameyî kerdî’ û wina dewam kerd: “Bitaybetî hetê çapemenîye de xeylê vurîyayîşî ameyî kerdene. Nînan ra ANF demêko derg o no het de xizmetê şarî keno. ANFyî sere de bi tirkî û ziwananê bînan dest pêkerd. Nika zî beşe kirmanckî ame akerdene. Abîyayîşê kirmanckî herçiqas ke erey bo zî seba şarê ma yê kirmancî zaf hol o, gamêka muhîme ya. Ez kesê ke keda înan esta û kesê ke nika gurîyenî rê serkewtiş wazena. Înan pîroz kena û çi destê mi ra bêro ez do bikera. Bitaybetî ez do xeberan biruşna înan rê.”

ANFYÎ GAMÊKA MUHÎME EŞTE

Araratî dewamê qiseykerdişê xo de bale ante rewşa kirmanckî ser û wina va: “Rewşa ziwanê ma yeno zanayene; ver bi vînîbîyayîşî şono. Verê dewanê ma de ziwanê ma ameyêne pawitene. Serranê peyênan de bi averşîyayîşê televîzyon û înternetî cuya dewan zî bedilîyaye. Êdî polîtîkaya asîmîlasyonî zî bi hawayo hîn asanêr keweno dewan. Ma vînenî ke Kurdîstan de cuya dewanê ma de vurîyayîşî bîyî. Bitaybetî domanê ma ziwanê xo nêmusenî. ANFyî seba ke domanê ma ziwanê xo vînî nêkerî, gamêka muhîme eşt. Ganî herkes taqîb bikero û hetkarîye bikero.”

WA ROŞNVÎRÎ ZÎ HETKARÎYE BIKERÎ

Araratî peynîya qiseykerdişê xo de va ‘kirmancan mîyan de xeylê roşnvîrî estî’ û wina qedêna: “Bitaybetî kesê ke Unîversîteya Artuklu de wendî û tez amade kerdî zî eşkenî hetkarîye bikerî. Ganî ma wina bikerî ke ANF seba averberdişê kirmanckî rolêko rind kay bikero û bibo wesîleya averşîyayîşan.”

EZ KEDKARANÊ ANFYÎ PÎROZ KENA

Nuştox û rojnameger Wusênê Gestemerdeyî zî abîyayîşê beşe kirmanckî muhîm dî û wina va: “Wareyê kirmanckî de na xizmete xizmete de qiymetin a. Raştî kî kar û xizmeta ke bi ziwanê ma kirmanckî êna kerdene, cayê xo lêwe mi de hem zaf hêca wo, hem kî zaf qîmetin o. Seke êno zanitene Ajansê Xeberan yê Firatî (ANF) bi zaf ziwanan xizmete de zaf hewl û zaf kî xizmete de rinde keno. Xizmetê ANFyî ra yew kî bi ziwanê kirmanckî dest bi weşanî kerdene bîye. Raştî kî ez bi nameyê xo zaf bîya kêyfweş, ke ewro êdî bi ziwanê ma xizmete de zaf rinde û xizmetede profesyonele êna kerdene. Wareyê kirmanckî de nê xebatê nîyanênî zaf hêca yê, zaf kî delal ê. No semed ra kî ez kedkaranê ANF Kirmanckî fîraz kena û nê xebatê hêcayî de înan rê serkewtene wazena.”

GANÎ MA BI ZIWANÊ XO XIZMET BIKERÎME

Gestemerdeyî dewamê qiseykerdişê xo de qala wayîrvejîyayîşê kirmanckî kerdo û wina vato: “Ma gere her cayê cuye de bi ziwanê xo kirmanckî xizmete bîkerîme, ke wa ziwanê ma kirmanckî êdî çêye ra vejîyo teber. Roja ewroyêne de raştî kî xizmeto ke ANF News keno, mi ra gore xizmetê de zaf hêca wo. Qomê ma kî gere na xizmeta ke bi ked û emeg, bi fedekarîye êna kerdene na kede re wayîr vejîyo. Mordem gere qedr û qimetê keda însanî bizano. Kar û gûreyewo ke yane xizmeto ke bi kirmanckî ênê kerdene pêro bi ked, bi emeg û bi fedakarîye êno kerdene.”

MA KÎ GERE BI RAYA DEMOKRASÎ MUCADELE BIKERÎME

Gestemerdeyî peynîya qiseykerdişê xo de wina va: “Qomê man o hêca û delal, bêveng vinetene merdena ma wa. Hondawo ke ma bêveng vinderîme, zulumkarî kî ma ser o zulmê xo berdewam kenê. Qatîye ci bibê hukumatê AKP bi OHALî veng û vac re ma birnay bî. Bi raya OHALî televîzîyonê ma, xêyle rojnameyî û kovarê ma kerdî kîp. Nê zulmkarî bi naye kî nêvinetî heto bînra kî xêle kedkar û emeg darî guretî zere û hona kî no zulm berdewam keno. Ma kî gere verba nê zulmî de xover bidîme û bi raya demokrasî mucadele bikerîme. Qet bêguman bîr û bawerîya mi awa ke Ajansê Xeberan yê Firatî bêşê kirmanckî de seba qomê ma xizmeta de bêqusire û hêcayê ano sere. O waxt ma kî bêguman benîme teqîpkerdoxê ANF Kirmanckî.”