Wan de qesawetê Korona beno bila. Şaristanê Wanî sînorê Îranî de yo ke Îran de bi seyan kesî pê Korona kewtî û merdî. Şarê Wanî seba ke vera Korona tebdîr bigêro şî dermanxaneyan ke maske û hacetê pakîye bihêrîno. Labelê şar pê vaya maske û hacetan mat mend. Korona ra verî vaya maskeyan 5 TL bîye, la nika bazaran de vaya ci bîye 150 TL. Pêro vaya hacetanê pakîya destî zî bîye  zêdêr. Sena ke depoyan de maskeyî kêm bîyî şar bazarê reşî de gêreno maskeyan. Kesê ke vîrusê Korona sey firsend dî kuçeyan de dest pê rotişê maskeyan kerd.

Seba ke depoyan de maskeyî û hacetê pakîye yenê vindertene û nênê rotene vaya nînan bîye zêdêr. Di merkezê depoyanê dermanxaneyanê Wanî nika veng ê.