Rêxistina DEM Partî ya Wanî verê banê xo de bi eşkerayîye daye û seba ke xeylêk kurdî bi rîyê govende û sloganan ra ameyî tepiştene nêrazîbîyayîş mojna ra.

Çalakîye de pankartê "Em bernadin vê dîlanê / Ma na govende canêverdenê"  ame akerdene û slogana, “Zimanê me rûmeta me ye/Ziwanê ma rumetê ma yo” ameye vatene.

Hemşaredarê Bajarê Pîlî yê wanî Neslîhane Şedal û Abdullah Zeydan, Wekîlê DEM Partî yê Wanî Mahmut Dindar, îdarekarê DEM Partî û DBPyî yê bajar û qezayan, MEBYA-DER, TUHAY-DER,TJA, Mayê Haştîye û xeylêk kesî tewrê çalakîye bîyî.

Vervatoxa Komîsyonê Ziwan û Kulturî yê DEM Partî Heval Dilbahar vat: ''Dinya çend şino aver şina la îqtîdar hema hêrişê ziwanê kurdan keno. Ê do meeşê bi nê hêrişan ziwan, kultur û govenda kurdan çîn bikerê. Çend rojî yo hêrişê govende kurdan kenê. Mersin, Îstanbul, Agirî, Êlih, Sêrt û tewr peynî de zî Colemêrg de rîyê ziwan, kultur û govenda kurdan ra xeylêk kesî tepiştî. No eyb o, şerm o. Ziwanê ma şerefê ma yo, ziwanê ma namûsê ma yo. Sey ziwananê bînan ziwanê kurdkî zî erjîyaye yo û bimbarek o. Verî kurdkî, dima kurdkî û her ca de kurdkî.''

Dima ra govende ameye girewtene. Gama ke şar bi slogananê "Bijî Serok Apo" û "Bê ziman jiyan nabe" waşt şiro banê partî mabênê polîsan hêtişê şarî kerd. Polîsan wextêk banê partî girewt binê ablûqa.