Çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de 69 wayîranê Xelatanê Nobele vera tecrîdkerdişê Rayberê Şarê Kurdî dezgehanê mîyanneteweyîyan ra mektube şawitbî.

Nê 69 kesayetan ra Wayîrê Xelata Kîmya yê Nobelî Prof. Jean Pierre Sauvageyo ke Fransa ra yo, derheqê armancê mektube de ANFyî rê qisey kerd.

Prof. Jean Pierre Sauvageyî bale ante xususanê mektube ser û vat: ''Birêz Abdullah Ocalan bi hawayêkê girankerdeyî ameyo cezakerdene. Hinî wextê ci ameyo ke o azad bibo.''

Prof. Jean Pierre Sauvageyî dîyar kerd ke seba çareserîya meseleya kurdan rolê Rayberê Şarê Kurdî Abdullah Ocalanî zaf girîng o. Sauvageyî vat: ''Veradîyayîşê Birêz Ocalanî do seba têkilîyanê mabênê komekê kurdan û hukmatê tirkî zî hol bibo.''

Jean Pierre Sauvage 1944 de Paris de dadîya xo ra bîyo û o kîmyager o. Ey wextêk Zanîngehê Strasbourgî de profesorîye kerde û 2016 de Kîmyagerê skoçî J. Fraser Stoddart û Kîmyagerê hollandayîjî Bernard Feringayî reyde Xelata Nobele girewte.