Meclîsê Asayîşê Karî û Weşîya Karkeran (ÎSÎG) raporêk eşkera kerd ke tede cînayetê karî yê wextê îqtîdarê AKPyî de qewimîyayê cagênê.

Goreyê raporê ÎSÎGî wextê AKPyî de tewr tay 32 hezar û 180 karkeran cînayetanê karî de dinyaya xo bedilnaye. Rapor de îqtîdarê AKPyî sey 'rejîmê cînayetanê karî' ame pênasekerdene.

Rapor de dîya zanayene ke qirkerdişê karkeran ê sey Somna, Amasra, Hendek, Tuzla ûsn. wextê AKPyî de qewimîyayê. ÎSÎGî rapor de pê hesna ke nêweşîyê meslegan wextê AKPyî de zêdîyayê û dewlete nê nêweşîyî nimitî.  Rapor de bale ameye antene ser ke cînayetanê karî de ceza nêdîyena sermaye û wayîranê karî û asayîşê karkeran nêno caardene.  

ÎSÎGî dîyar kerd ke wextê îqtîdarê AKPyî de hûmara domanê karkeran zêdîyaya û her serre 60-70 domananê karkeran dinyaya xo bedilnaya.