Wezaretê Perwerdeyê  Neteweyî  pêşnîyazê persî yo ke hetê wekîla Êlîhî yê HDP'yî  Ayşe Acar Başarane ra ame dayene, rê dimayê 3 mengan cewab da. Pêşnîyaz de Serekê Daîreyê Zanist û Kirarî yê Unîversîteya Munzurî Cem Tekînoglû bi tehdîtan tayê wendekaranê cinîyan rê zor da ke pê perayan ê wendekarî wezîfedaranê umûmîya reyde têkilîya cinsî bivirazê ame persene.

Ayşe Acar Başarane 28'ê Hezîrane de pêşnîyazê persî seba ke cewab bido pêşkêşê Hetkarê Serekkomare Fuat Oktayî da û cewabo ke hetê Wezîrê Perwerdeyê Neteweyî Zîya Selçukî ra ame dayene, de ame vatene ke Zanîngehê Munzurî de hetê hetkarê rektorî ra komîsyonê cigêrayîşî seba îdîaye amebi sazkerdene û seba ke delîlêko musbet çinêbi derheqê Tekînoglûyî de tehqîqat nêame akerdene. Derheqê têkîldarî de verê cû zî hema gerreyî nêameyî kerdene hetê zanîngehî ra bi îdîayanê "şîdetê verba cinîye" û  "tehdîtê verba endamê çapemenîye" de tahqîqato fermî amebi kerdene.

24'ê Hezîran de serê medyaya komelkîye de amebi  parbekerdene ke Serekê Daîreyê Zanist û Kirarî yê Unîversîteya Munzurî Cem Tekînoglûyî bi zor dano tayê wendekaran ke ê wezîfedarê umûmîya sey walî û qaymeqam reyde têkîlîya cînsî virazê. Tekînoglûyî dima hesabê xo yê medyaya komelkîye padayî û cewab nêda îdîayan. Aktîvîstê dezgehan û rêxistinan ê cinîyan reaksîyon dabi û seba ke Tekînoglû karê xo ra bêro girewtene kampanyaya îmzaye dabi destpêkerdene. 7 Wekîlanê HDP'yî zî bi îddîaya ke Tekînogluyî verê cû zî cinîya bi nameyê R.A. rê şîdet û tehdît kerd, tewrê pêşnîyazê persî kerd û serebût berd rojdemê meclîsî û Hetkarê Serekkomare û Wezîrê Karan ê Zereyî rê pers kerd.