Emîne Şenyaşara ke mêrde û di lajê ci Pirsûsê Riha de 14ê hezîrana 2018î de hetê merdimanê Wekîlê AKPyî yê verênî Îbrahîm Halîl Yildizî ra ameybî qetilkerdene, 946 rojî yo Nobeta Edaletî de ya.

Emîne Şenyaşara ke verê Edlîyeya Riha de dest pê Nobeta Edaletî kerd,dima ra çalakîya xo kirişte Anqara û 100 rojî yo verê Wezîrîya Edaletî de Nobeta Edaletî kena. Wekîlê DEM Partî yê Riha Ferît Şenyaşaro ke hem Riha de hem zî Anqara de dayîka xo têna nêverda, ANFyî rê qisey kerd.

Ferît Şenyaşarî vat: “Ma zaf rey muracatê Wezîrîya Edaletî kerd, mektup nuşt, pêşnîyazê persî dayî la qet cewabêk nêgirwet. Coka ma mecbur mendê ke verê Wezîrîya Edaletî de dest pê çalakîye bikerê. Seba ke Wezîrê Edaletî Yilmaz Tunçî vat çîyo ke hewce keno do bikero ma mabên da çalakîya xo la seba ey sozê xo nêtepişt ma reyna dest pê çalakîye kerd. Birayêkê mi nizdê 6 serran o zîndan de yo. Seba ke gamê huqûqî nêerzîyayî, birayê mi vera nêdîya ma çalakîya xo daye domnayene. 

Partîya îqtîdarî, hukmat û serekkomar zî tede wekîlê xo tke nêweşxane de qirkerdiş kerd, pawit û ma sey terorîstî îlan kerdî. 5 serrî ravîyartî qetilkarî hema nêameyî cezakerdene. Ma rixmê heme astengkerdişan têkoşînê xo domnenê. Ma qerardar ê, waştişê ma edalet o. Heta ameyîşê edaletî do çalakîya ma dewam bikero. Riha de paştdayîş dahîna xurt bi. Ma tîya çalakîya goreyê qanûnî kenê. Wa paştî bidîyo ma ke wa edalet bêro caardene. Verê Wezîrîya Edaletî de dayîka 70 serrî edalet wazena. Merdime wayîrê wîjdanî ganî aye têna meverdê.”