Ronayoxanê PKKyî ra Sakîne Cansiz, Temsîlkara KNKyî ya Parisî Fîdane Dogan û Endamê Têgêrayîşê Ciwanan Leyla Şaylemez 9ê çeleyê 2013î de Buroyê Enformasyonî yê Kurdîstanî de, paytextê Fransa Paris de ameybî qetilkerdene. 23yê kanûna 2022yî de zî Merkezê Kulturê Kurdan ê Ahmet Kayayî de Endama Konseya Rayberdişî ya KCKyî Emîne Kara (Evîne Goyî), hunermend Mîr Perwer û welatperwer Abdurrahman Kizil ameyî qetilkerdene.

Wird qirkerdişî zî bi organîzasyonê MÎTî ameyî kerdene. Qirkerdişê 9ê Çeleyî hetê tetîkkêşê MÎTî Omer Guneyî ra, Qirkerdişê 23yê Kanûne zî hetê tetîkkêşê fransizî William Maletî ra ame kerdene.

Metodê înan cîya bîyê zî wird kiştoxanê Qirkerdişê Parisî William Malet û Omer Guneyî de hetê seyciyî bîyî:

Wird zî nêremayî

William Maletî dima ke hîrê kurdî qetil kerdî guleyî verdayî restaurantê Avesta yê verê Komeleya Kulturê Kurdan û dima zî guleyî verdayî berberê Munzurî. Wexto ke şarjorê ci qedîya William Malet hetê kurdan ra ame bêtesîrkerdene û teslîmê polîsan ame kerdene. William Malet eşkerayêne qirkerdişî ra dima biremo la wina nêkerd. Omer Guneyî zî 9ê çeleyê 2013î ra çend rojan dima hetê kurdan ra teslîmê polîsan amebi kerdene.

Wirdî zî nijadperest û kiştoxê profesyonelî bîyî

William Maletî îfadeyê xo yê verênî de vat ke o nijadperest o û kurdan ra aciz o. Omer Guney zî sey nijadperestî şinasîyayêne. Keyeyê Guneyî qirkerdişî ra dima ANFyî rê qisey kerd û vat: ''Ey tim xo rê vatêne 'ez tirkêkê Osmanîyan a. Ey kurdan ra hes nêkerdêne, nijadperest bi.''

William Malet 69 serre, Guney 32 serre bi û wirdî zî kiştoxê profesyonelî bîyî. Guleyanê Guneyî pêro îsabetê bedenanê hîrê cinîyan ê kurdan kerd. William Malet de 7 guleyî est bîyî. Nînan ra di guleyî eştî Evîne Goyî, yew eşt Mîr Perwerî û yew zî eşt Abdurrahman Kizilî, ê hîrê guleyî zî verdayî berberî. William Maletî dima ke guleyo verêne eşt ci Evîne Goyî birîndar bîye. Maletî nêzdîyê ci ra seba ke bikişo guleyo diyîn zî eşt Evîne û a 'înfaz kerde.'

Omer Guney Eyaletê Bavyera yê Almanya de tim polîgonan de perwerdeyê çekan girewtêne.. Wezîrê Karanê Zereyî yê Fransa da zanayene ke William Maletî zî tim polîgon de çekî eştêne.

Sabiqayê wirdînan zî est ê

23yê kanûne de Dozgerîya Parisî eşkera kerd ke William Malet wayîrê hîrê qeydanê sabiqa yê û verî zî hêrişê multecîyan kerdo. William Maletî nê hêrişî ra 12ê kanûna 2022yî de bi şertê kontrolê edlîyî vera dîyayo. 

Omer Guney zî wayîrê sabiqa bi. Qeydê ey ê sabiqa wextêk ame nimnayene la dima vernîyazê Wekîla verêne ya Partîya Çepe Ulla Jelpke ser o Wezîrîya Karanê Zereyî ya Almanya sabiqaya ci eşkera kerde.

Wirdî zî nêameyêne teqîbkerdene

William Malet û Omer Guney rixmê sabiqa û potansîyalê înan ê sûckerdişî ra hetê hêzanê asayîşî ra nêameyêne teqîbkerdene. 

Wirdînan zî vat 'Ez hetê mentalî ra nêweş a'

Kiştox William Malet dima ke tepişîya cade polîsan rê vat ke o nêweşo psîkolojîk o, tede 'hêrso parolojîk' est o. Polîsan naye ser o bire daye ke 'ganî William Malet nêtepişîyo' û berd klînîkê psîkolojî. La îtîrazan ser o William Malet newe ra tepişîya.

Rixmo ke 10 serrî derbaz bîyî 'nêweşîya' Guneyî nêameye roşnîkerdene. Amebi îdîakerdene ke sereyê ey de tumor est o. La raştîye de eşkera nêbi ke Guney nêweş o yan nê. Guney nêzdîyê roniştişê dewaya qirkerdişî de bii hawayêkê şikdarî 17ê kanûna 2016î de zîndan de merd. Selahîyetdaranê Fransa zî sebebê mergê Guneyî qetî eşkera nêkerd.