Vera xespkerdişê şaredarîyanê DEM Partî yê Mêrdîn, Riha û Xelfetî nêrazîbîyayîşî dewam kenê. Bi hezaran kesî vera xespkerdişê îradeyî vejîyayî waran. Hemserekê Pêroyî yê DEM Partî Tulaye Hatimogullari û Tuncer Bakirhan û Hemserekê Pêroyî yê DBPyî Keskin Bayindir rêxistina bajarî yê Êlihî ameyî têhet. Tîya ra ver şaredarîye rayraşîyayîş ame kerdene.

Hemşaredara Êlihi Gulîstane Sonuka ke wezîfeyê ci ame xespkerdene nê vatî: ''Wa îşxalkerî hole bizanê ke xespkerdişê îradeyê şarî rehet nîyo. Ma do milê xo çewt nêkerê. Ma hinî destûr nêdanê ke şima îradeyê ma nêvînayîşî ra bêrê. Ganî no qerar cade peyde bêro girewtene. Ma qerardar ê, ma do wayîrê îradeyê xo bivejîyê û peyser game meerzê.''

Keskin Bayindirî çalakîye qisey kerd û vat: ''Înanê ke qala haştîye kerdêne ewro îradeyê kurdan rê destê xo kerd derg. Ma do her ca de wayîrê îradeyê xo bivejîyê. Planê înan vergirewtişê serkewtişê şarê kurdî yo. Ma ewro planê Erdogan û Bahçeliyî Êlih û Mêrdîn de dîyî. Cewabê ma înan rê sey tim reyna xoverdayîş o.''

Tulaye Hatimogullari zî vat: ''Na darbeya sîyasî ya û eynî wextî de darbeya hukmî ya. Şarê kurdî vera nê do bibo yew bi têkoşînî cewab bido. Ma do pîya bi cinîyan û şaranê Tirkîya wayîrê îradeyê xo bivejîyê.''

Tuncer Bakirhanî zî qiseykerdişê Devlet Bahçeliyî vist vîrî û nê vatî: ''Nê dizdan, xayînan ke tesfîyê plan kerd, ma rê destê xo kerdbi derg. Ma zî destê xo kerdbi derg.  Ma vat qey muzakere kenê; şarê kurdî reyde haştîye kenê ke bi serran o nêeşkenê vera têkoşînê ci ser bikewê. Ma dî ke reyna planê înkardişê kurdan kenê. Ma veng danê ke wa her kes vera nê zîhnîyetê qeyûmî têkoşîn bikero.''

Reyna Mêrdîn û Xelfetî û xeylêk bajaranê bînan ê Kurdîstanî de şarê kurdî û sîyasetmedarê ci vera xespkerdişê şaredarîyan kuçeyan de yê.