Seba wedaritişê tecrîdî serê Rayberê Şarê Kurdî Abdullah Ocalanî Strasbourg de çalakîya grevê vêşanîye ya bêdem û bêagêrayîşî amebî destpêkerdene. Çalakwan Kardo Bokanî û Mûhammed Ghaderî derheqê çalakîyanê xo de qisey kerd.

Bokanî vat ke, “Her gama ke dayîkan serkêşîya ci kerda, resta serkewtişî û no serewedaritişo ke Kurdistan de ganî hêz bido ma.”

2 çalakwanê ke Rojakewtena Kurdistanî ra yê, bi nameyê Kardo Bokanî û Mûhammed Ghader da zanayene ke seba ke tecrd bêro wedaritene înan dest bi xoverdayîşî kerdo û derheqê pêvînayîşê Îmraliyî de zî fikrê xo pare kerdî.

Çalakwan Kardo Bokanî ard ziwan ke bi moralêkê girdî ê çalakîya xo dewam kenê û vat ke “Roje bi roje çalakîye xurt bena. Na çalakîye wareyê dîplomasîyê mîyanneteweyî de tesîrêko gird viraşt. Tewr peynîye de Parlementoyê Brîtanya de vengê ma ame heşnayene. Ma wazenê tecrîdê serê Rayber Apoyî bêro wedaritene. Seba naye zî ma amade yê ke bedelan bidê. Nika rojeyê mergî merheleya krîtîke de yê û ganî şarê ma nê serewedaritişî xurt bikero ke dayîkî serkêşîya ci kenê.

Na gama ke dayîkî serkêşîya ci kenê, resta serkewtişî û ganî ma nê serewedaritişê Kurdistanî xurt bikerê. Eke ma na hemle xurt bikerê ma eşkenê Rayberîye, Kurdistan û nasnameyê xo azad bikerê.”

Çalakîye tesîr bi Rojawanî kerd

Mûhammed Ghaderî zî ard ziwan ke ey pêvînayîşê Îmraliyî ra moralêko baş girewto û pêvînayîşî ra dima mîyanê cilan ra vejîyayo.

Ghaderî da zanayene ke, bi xoverdayîşî do Rayberîye û Kurdistan eşkenê bêrê azadkerdene û vat, “Çalakîyanê ma Rojakewtena Kurdistanî de veng vet. Hepisxaneyanê Îranî de zî hevalanê ma çalakîyî viraştî. Rojakewtena Kurdistanî roje bi roje averde şina.Labelê seba welatêk azad, ganî  yewîtîye biba. Ganî ma pîya têkoşînî xurt bikerê.”