Sîyasetmedarê kurdan nuştox Fuat Kavî ke qala qehremananê Rojeyê Mergî yê Pîlî yê 14ê Temmuze kerd vat, şehîdê şorişgêrî bi cesaret, ehlaq û xoverdayîşê xo çalakîyêka efsanewî de ameyî têhetî.
Sîyasetmedarê kurdan nuştox Fuatî bi wesîleya serrgêra Rojeyê Mergî yê Pîlî yê 14ê Temmuze ANFyî rê qisey kerd.
Kavî vat, ''Heme kadroyê serkêşî yê têgêrayîşê PKKyî Zîndanê Amedî de ameyêne tepiştene û seba ke îradeyê înan bêro şiktene û teslîm bêrê girewtene sîyaset ameyêne rayra berdene. Coka rolê Zîndanê Amedî zaf gird bi. Xoverdayîşo ke ûca ameyêne dayene xoverdayîşê şorişê Kurdîstanî bi hem zî semedê Rojhilatê Mîyanênî berê şorişî akerdêne. Verê Rojeyê Mergî yê Pîlî yê 14ê Temmuze xora çalakîya hemra Mazlûm Dogan û çalakîya çaran ameybî kerdene. Nê wird çalakîyan xoverdayîşê PKKyî fînabi çiman ver û tesîro pîl arifnabi la verê caardişanê zîndanî nêgirewtbi. Coka çalakîya newî hewce kerdêne ke na zî çalakîya Rojeyê Mergî yê Pîlî yê 14ê Temmuze bî.
Bi na çalakîya rojeyê mergî ameyêne waşten eke wa zextê vera pawitişanê sîyasîyan bêrê wedaritene û îşkence bêro qedînayene. Xoverdayoxanê zîndanî nêeşkayenê pawitişê xo hazir bikerê. Zîndan de îşkence, kaos bibi, heta heyatê mehkeme de zî îşkence kerdêne.Kadroyanê serkêşan ê PKKyî ra Hayrî Durmuş, Kemal Pîr û Mazlûm Doganî waştêne pawitişê sîyasîyî bikerê û raştîya Kurdîstanî vejê meydan la destûr înan nêdîyayêne. Amîrê asayîşê zereyê zîndanî Esat Oktay Yildaran û ekîbê ci bi îşkenceyanê taybetan verê pawitişanê sîyasîyan girewtêne. La 14ê temmuza 1982yî de embaz Hayrî Durmuşî mehkeme de pêzor heqê qiseykerdişî girewt, verî rejîmê 12ê Êlule erjna, qala xoverdayîşê heqdarî yê PKKyî kerd û dima rojeyê mergî da destpêkerdene.''
Fûat Kavî qala xoverdayoxanê çalakîya pîle Hayrî Durmuş, Kemal Pîr, Akîf Yilmaz û Alî Çîçekî kerd ke şertanê zehmetan de merg girewt çim û çalakîyê ka efsanewî de ameyî têhet û vat na çalakîya serkewtîye vera faşîzmî vendayîşê xoverdayîşî bi.
