Hemsereka Konseya Rayberdişî ya KCKyî Besê Xozat îfade kerd ke kurdan nê 25 serran de bi xoverdayîşê vera Komployê Mîyanneteweyîyî şorişê netewe kerdo û vat ke serra 26ine de zî Hemleya Azadîye do komelkî û girseyî biba.
Hemsereka Konseya Rayberdişî ya KCKyî Besê Xozat derheqê Komployê Mîyanneteweyîyî û Hemleya 'Abdullah Ocalanî rê Azadîye, Meseleya Kurdan rê Çareserîye' de ANFyî rê qisey kerd.
Qiseykerdişê Besê Xozat ra tay noqtayê girîngî wina yê:
''Rayber Apo 25 serrî yo vera sîstemê îşkence û tecrîdî yê Îmraliyî bê mabênî xo ver dano û têkoşîn keno. Rayber Apo nameyê cinî, ciwan û kurdan ser o nê xoverdayîşî rê dewam keno. Rayber Apoyî nê 25 serran de pawitişnameyê xo nuştî û paradîgmaya neteweya ekolojîke, demokratîke û azadîgîra cinîyan ber arde.
Nê 25 serran de şarê ma, cinî û ciwanan zî vera Komployî û tecrîdê Îmraliyî xoverdayîşêko bêhempa kerd û bedelê pîlî dayî. kurdan nê 25 serran de bi xoverdayîşê vera Komployê Mîyanneteweyîyî şorişê netewe kerd. Ney zî tesîrê pêro Rojhelatê Mîyanênî kerd.
Çarçewa Hemleya Azadîye de xebat, çalakî û aktîvîteyê girîngî yenê kerdene. Xora Hemleya Azadîye dormeyê xoverdayîşê Îmraliyî de hende bi xurtî aver şina. Nê 25 serran de xoverdayîşê Îmraliyî bîyo global. Hemleya Azadîye zî îsbatê ney o.
Paradîgmaya ey Rayber Apo kerd lîderêko global. Rayber Apoyî bi na paradîgmaya xo nakokîya sosyalîzmî çareser kerde û sosyalîzmo reel pûç kerd. Rayber Apoyî mîyanê paradîgmaya xo de rayîr û metodê rêxistinkerdişî eşkera kerdî û seba pêro bindestan, kedkaran, cinîyan û şaran çareserîyê meseleyan pêşkêş kerdî.
Hemleya Azadîye bi rayraşîyayîşê Kolnî derbazê safhaya diyîne bîya. Na hemle xora do dewam bikera la serra 26ine de zî Hemleya Azadîye do komelkî û girseyî biba. Nika verê ma de Roja Cinîyan a 8ê Adare est a. Ganî cinîyî 8ê Adare de hemle xurtêr bikerê û bi girseyî tewrê hemle bibê. Ancî Newroze de zî ganî ma bi xurtî wayîrê Hemleya Azadîye vejîyê.
Safhaya diyîne de ganî vera tecrîdê Îmraliyî têkoşînêko huqûqî yo xurt bêro kerdene. Ganî ma pêro dewletanê ke Îmrali de hemparê bêhuqûqîye benê teşhîr bikerê. Ewro azadîya Rayber Apoyî teyna seba kurdan ney seba pêro şaranê dinya meseleyêka girîng a. Her kes azadîya Rayberîye de azadîya xo vîneno.
Sîstemê Îmraliyî dewamê Komployê Mîyanneteweyî yo. Komplo bi têkoşînî ame pûçkerdene la no qîm nêkeno. Ganî ma Rayber Apoyî azad bikerê. Rayîrê serkewtişî xoverdayîş û têkoşîn o. Têkoşînê seba azadîya Rayber Apoyî têkoşînê azadîya her kesî yo.''
