Hemsereka TUHAY-DERî ya Wanî Edîbe Babur derheqê îşkence, kerdişanê xiraban û tedaya poşmanîye ya Zîndanê Wan û Patnosî de ANFyî rê qisey kerd.

Edîbe Babur îfade kerd ke zîndananê Tirkîya de rewşe zaf tehlukeyîn a û vat: ''Bi her hawayî teda û îşkenceyê embazanê ma yeno kerdene. Patnos de rewşe zaf xirab a. Goreyê qiseyanê keyeyan qanûnê poşmanîye tepişteyanê sîyasîyan rê yeno ferzkerdene. Pêşnîyazê 'Poşman bibe ma do to vera bidê' yeno kerdene. Wexto ke tepişteyî naye qebul nêkerê zî cezaya hucreyî dîyena înan. Ganî Wezîrîya Edaletî ney rê yew çareserîye peyda bikera.''

Edîbe Babur ard ziwan ke têna Zîndanê Patnosî de nê Zîndanê Asayîşê Berzî yê Wanî de zî tepişteyî bi bahaneyan vera nêdîyenê û vat: ''Seba ke vanê ê poşman nîyê, înan rê kerdişê xirabî yenê kerdene. Tepişteyê sîyasîyê ke 30 serrî yo zîndan de yê, yenê mexdûrkerdene. Nê kerdişî nênê qebulkerdene. Ma venga hukmatî danê ke wa nê polîtîkayan ra fek vera bido.''