Organîzasyonê Bajarî yê HDP’yî yê Stenbolî do Newroze 24’ê Adare de, roja Yewşemeyî Bazarê şarî yê Bakirkoyî de pîroz bikerê. HDP texmîn keno ke do nizdîyê mîlyonêk kesî bêrê pîrozkerdişê Newroze. HDP bi broşur, pankart û vengdayîşanê serê medyaya sosyale ra veng dano ke beşdarê Newroze bibê.

Endamê Koordînasyonê Amadekarî yê Newroze Atîlla Ozdagî derheqê amadekarîyanê Newroze de hayîdarîyî dayî. Atîllayî vat, “Manayêka tarîxîye ya Newroze esta, la teberê nê de wayîrê manayêka tarîxîye yo. Xusûsen ewro a roj a ke hemverê zaliman de xo organize bikerê, mucadeleyê xo xurt bikerê. Hetê sîyasîyî ra zî rojêka winayên a ke Kurdan xoverdayîşî ser o kerdo vêşî, şarê Rojakewtena Mîyanêne reyde zemînêkê hemparî bica ana. Newroze bîya platformê mucadeleyî. Newroze hendî sînorê Rojakewtena Mîyanêne zî ravêrtî. Nay era cayêkê aye yo taybet esto.”

Grevanê Vêşanîye Hîna Kena Manîdar

Ozdagî vat no nizdîyê 10 rojî yo ke ê xebate kenê û da zanayene ke Newroza emserî bi hawayêkê bêhempayî pîroz bikerê û wina domna, “Ma sey di merkezan fikrênê. Newroza Amedî sey her wextî muhîm a, la ya Stenbolî zî tewr tay qasê ya Amedî muhîm a. Stenbol ê bajaran ra yew o ke Kurdî tede zaf ciwîyenê. Eke bi manaya ke ma daya ci biewnîrê ci ra, vernîya ma de di weçînitişî estê û hemverê tecrîdî de xoverdayîşê Leyla Guvene dewam keno. Ma wazenê Newroze nê mucadeleyî dir bikerê yew, bikerê pîrozkerdişêk ke mucadele bireso sewîyeya tewr berze. Naye ra ma manayêka taybete danê ci.”

Hedefê Ma 1 Mîlyon o

Ozdagî ard ziwan ke înan hemee amadekarîyê xo kerdê, wazenê Newroze bi tewrbîyayîşê mîlyonêk kesan pîroz bikerê. Ozdagî peynîya qiseykerdişê xo de nê vatî: “Seba nê zî zemîn esto. Hêrsêk ameyo pêser. Ma vanê do no hers xo 24’ê Adare de meydanê Bazarê Şarî yê Bakirkoyî de do xo ramojno. Ma vilawekanê xo vila kenê. Wesayîtê ma yê anonsî veng danê. Ez bawer kena ke emser do bêhempa bo, no do bêro dîyene.”