YJK-E û KCDK-E bi eşkerayîyêk da zanayene ke Serekkomarê tirkî R.Tayyîp Erdogan 26-28 û 29ê êlule de Almanya de do bêro protesto kerdene û waşt ke wa herkes vera dîktatorîye de tewrê çalakîyan bibo.
Yewîya Cinîyan ya Kurdanê Almanya (YJK-E) çalakîyê şermezarkerdişê Erdoganî ke do 26-28 û 29ê aşme de berî viraştene viste vîr û waşte ke wa herkes tewrê nê çalakîyanê 'Ti xeyr nêameyî Erdogan’ bibo.
Eşkerayî de wina ameyo vatene:
“Erdogano faşîst bi polîtîkaya xo ya hêrişkare welat ser û bin kerdo. Îktîdarê 16 serran yê AKPyî ewil cinî û heme şaran rê tena qetlîam, merg, surgun û hesirî ardî. La Almanya ya pîya welatanê Ewropa nê qewîmîyayîşan rê bêveng mendî û bi polîtîkayanê lêşinan bîyî şîrigê sûcanê Erdoganî.”
YJK-Eye dîyar kerde ke 26ê aşme de xeyle bajaranê Almanya de rayberîya cinîyan de çalakîyî do bêrî viraştene û 28 de Berlîn 29 de Kolnî de çalakîyê merkezî do bêrî viraştene û waşte ke wa herkes tewrê çalakîyan bibo û diktatorî ra vajo ‘Ti xeyr nêameyî Erdogan’.
Hemserekîya Dîvanê KCDK-Eye zî bi eşkerayîyêke seba tewrbîyayîşê çalakîyan veng da.
Goreyê naye çalakîyê merkezî 28ê êlule saete 16.00 de Postdamerplatzê Berlînî de û 29ê êlule saete 11.00 de Deutzer Werftê Kolnî de do bêrî viraştene.
Bajarê Oldenburg, Hamburg, Bremen, Hannover, Kiel, Kassel, Salzgitter, magdaburg, Dresden û Halle ra şar do tewrê çalakîya Berlînî bibo.
Bajarê Munster, Bilefeld, Dortmund, Essen, Duisburg, Dusseldorf, Bonn, Koln, Gissen, Mainz, Darmstadt, Saarbruken, Suttgart, Munchen, Nurnberg, Heilbron, Pforzheim, Ulm, Bodensee ra zî do paştî bidiyo çalakîya Kolnî.
KCDK-Eye waşt ke wa herkes vera Erdoganî de tewrê çalakîyan bibo û meydanan de bi vengêko berz dîktatorîye û qetilkerdişanê ci rê vajo nê.
