YPJyî pare kerd ke Tirkîya pê muhakemekerdişê şerwana înan Çîçeke Kobanê qanûnanê mîyanneteweyîyan binpay kena û ganî komelo mîyanneteweyî ney şermezar bikero û seba veradayîşê Çîçeke bixebito.
Fermandarîya Pêroyî ya Yewînanê Pawitişê Cinîyan (YPJ) derheqê muhakemekerdişê şerwana înan Çîçeke Kobanê de eşkerayîyêke daye.
Fermandarîye eşkerayîye de ard ziwan ke Çîçeke Kobanê wextê îşxalê Girê Sipî û Serêkanîyê de hetê cerganê Tirkîya ra tepişîyaye, mehkemeya tirke de ameye muhakemekerdene û cezaya zîndanî ya muebede dîyaye ci. Fermandarîye pare kerd ke Çîçeke Kobanê erdê Tirkîya de qet yew sûc nêkerdo coka dewleta tirke nêeşkena aye muhakeme bikera. YPJyî eşkera kerd ke dewleta tirke bi nê hawayî peymanê esîran ê mîyanneteweyî binpay kerdî.
YPJyî vat: ''Dewleta tirke qestî ra hemwelatîyanê Sûrîye bena Tirkîya û muhakeme kena. Nê kerdişî hetê Neteweyanê Yewbîyayeyan (NY) û rêxistinanê mîyanneteweyîyan ra ameyî îsbatkerdene û şermezarkerdene. Nînan venga Tirkîya da ke peynîya nê kerdişan bîyara la Tirkîya goş pa nêkewte. Wa NY û rêxistinê mîyanneteweyî nê sûcanê Tirkîya şermezar bikerê. Ma do vera nê sûcan têkoşînê xo rê dewam bikerê. Dewleta tirke qesasê DAÎŞî gêna xora bira ceza ya serê Çîçeke Kobanê roja xelisnayîşê Baxozî de dîyaye. Ma venga pêro cinîyan danê ke vera nê kerdişan tewrê xo bimojnê û seba veradayîşê Çîçeke Kobanê bixebitê. Ma do asta berze de têkoşînê seba azadîya cinîyan pîlêr bikerê.''
