Grevê vêşanîye û rojeyê mergî yê vera tecrîdê serê Rayberê Şarê Kurdî Abdullah Ocalanî dewam kenê. Çalakgeran ra yew zî Zekî Ulaşo ke hîna 12 serrî yê xo de seba ke kemere eştibî polîsan amebi girewtene û nika 21 serrî yo.

Keyeyê Ûlaşî yo ke dewa Sêrtî ra yo, 30 serrî verê cû rîyê zext û zordarîya dewlete ra mecbûr mend koç bi Edene kerd. Keyeyê Ûlaşî ard ziwan ke ê timî bi hesreta weletî ciwîyenê, ewro hîna zî paweyê a roje ke agêrê serê erd û wareyanê xo. Zekî Ulaş domanêkê 4’ine yê keyeyê 8 domanan o. Ûlaşo ke fek lîse ra verdayo, wexto ke reyêk seba dawetêk şono dewa, êdî hesreta welatî kewena zerrîya ey. Tim maya xo ra wazena ke ci rê qalê dewa bikera. Vat, xeyalê ey o tewr gird zî o bi ke dewa ma ya ke dişmenî veşnaye de keyeyêk virazo.

Ûlaşo  12 serrî seba ke kemere eşte polîsan derheqê ci de dewaya ameye akerdene, 1 serre û 3 mengî ceza ameye birnayene. Hepisxaneyê Osmanîye de seba ke nêşîyo mehkeme 1 serre û 8 mengê bînî zî ceza ci rê yena birnayene. Ûlaş 105 rojî yo grevê vêşanîye de yo. Hamîde Ûlaşa ke xeylî fikarê lajê xo kena vat, “Ê zere de ma ra baştir xo ver ro danê. Rewşa înan baş nîya la rixmê naye xo ver ro danê û moralê înan ca de yo. Ma ra baştir ê, la zaf kîlo kerdo vîndî. Lajê mi vano, rewşa hevalanê ey giran a. Vat, hevalêkê ey bîyo 34 kîlo. Tekane waştişê înan ma ra o yo ke ma xo ver ro bidê.” Dayîke Ulaşî vat hewteyê vîyarte de ê şîye serdana Ulaşî û wina vat, “Lajê mi bêvengîya teberî ra lomê xo keno. Vano, ‘Çira vengê ma baş nêno heşnayene. Tekane hêvîya ma şima yê. Têkoşînê şima yo ke şima wareyan de danê ma do serfiraz bikero’”.