Selahattîn Meteyo ke 30 serrî zîndan de mendo, derheqê xoverdayîşê zîndanan, PKK, Komployê Mîyanneteweyî û 14ê Temmuze de ANFyî rê qisey kerd.

Meteyî pare kerd ke o 1698 de Nisêbînê Mêrdînî de dadîya xo ra bîyo. Meteyî vat: ''O çax Apogîrî, Kawa, DDKD û KUK est bîyî. Mîyanê komelî de her kesî Apogîran ra hes kerdêne çunke înan wexto ke çîyêk vatêne ardêne ca. Wextê Darbeya 80î de veera rêxistinanê Kurdîstanî operasyonê pîlî ameyî kerdene. Apogîran vera operasyonan xo ver da. 1988 de ez şîya Îstanbulî, leşkerîya tirkan. Mi uca ra fîra kerd, ez  tewra xebatan bîya. 1990 de zî ez tewra gerîlayan bîya. Ez serrêke û nêm warê gerîlayan de menda.

1992 de ez seba rêxistinîya şaristanan erşawîyaye Îzmîrî. Ez û yew embaz ma adare de Kemeraltiyê Îzmîrî de tepişîyayî. Ez verî Zîndanê Buca de menda. Ma uca de grevê vêşanîye kerd. Dima ez surgunê Zîndanê Aydinî bîya û 15 serrî uca de menda. Dima Zîndanê bi Tîpê Fyî ameyî akerdene. O çax ez erşawîya Zîndanê Kiriklarî û hucreyê Fyî de menda. Dima ez Zîndanê Odemîşî û Şakranî menda. 

Ê çaxan de serranê 90an de teber de serhildanê şarî est bîyê, zereyî de zî xoverdayîşê ma. Heta ke ez ameya Tîpê Fyî mi fam nêkerd ke ez zîndan de ya. Çunke seke ma teber de bîyê. La Tîpê Fyî de tecrîd est bi û keyeyî ra ber ez nêeşkayêne çewî bivîna. Tîpê Fyî de 2-3 kesî mendêne. Tede kontrolêko giran est bi. Dewlete nêverdayêne ke ma cuya komunale bikerê. Komun seba ma ameyêne manaya rêxistinbîyayîşî. Şorişgêrîye komunebîyayîş o. Dewlete seba ke mîyanê ma de paştdayîş aver nêşoro destûr nêdayêne cuya komunale.

1999 de wexto ke ma eşnawit ke Rayber Apo esîr kewto ma şok bîyî. Zîndanan de yew vengîye virazîyabî. Ma nêzanayêne ke se bikerê. Ma zaf kewtbî tesîrê nê serebûtî. Ma tim qisey kerdêne ke do se bikerê. La ma nêeşkayêne mîyanî ra vejîyê. Ma nêeşkayêne biewnê rîyê yewbînan ro. Xora zîndan de wexto ke babete ameyêne Rayberîye ser, cuye vindertêne. O çax xoverdayîşêko çetin qewimîya. Çalakîyê 'Şima nêeşkenê tîjê ma tarî bikerê' o çax qewimîyayêne. O çax zîndanan de tewirê Zîndanê Dîyarbekîrî yê 14ê Temmuze vejîya werte. 

Zîndanan de ma tim bi hawayêkê kelecanî 14ê Temmuze pawitêne û amadekarîye kerdêne. Ma bi aktîvîteyan û bernameyan embaz Hayrî, Kemal, Alî, Akîf û şehîdê bînî yad kerdêne. Ma a roje xo, têkoşîn û xoverdayîşê xo muhakeme kerdêne.. Ma kerdêne ke bibê layîqê înan.''