Rejîmê AKP û MHPyî zîndanan de huqûqê dişmenî dano domnayene.

AGIRÎ

Hepsîyê ke Zîndanê Tîpa Lyî yê Panosî de manenî, derheqê neheqîyan de mektûbêk erşawite. Mektûba hepsîyan wina ya:

“Embazê ma yê ke nêweşîya înan giran bîya û rewşa înan xirabin a, estî. Labelê nê embazî nînî tedawî kerdene. Zîndan de doktor çin o û ma nêşênî şêrî revîr. Bi hawayo cîddî problemê awe esto; awa zîndanî ra boya leximî yena. Xeylê embazê ma awe ra jehrî bîyî. Herçiqas ke nêweşxane de embazanê jehrbîyayeyan ra ame vatene ke ê awe ver jehrî bîyî zî, îdareyê zîndanî çîyêk nêkerdo. Embazê ke newe yenî no zîndan, ser înan de sehnayîşo rût yeno ferz kerdene. Dest ser ronîyeno radyoyanê ma û nêdîyenî ma. Bi hawayo kêfî rojname nêdîyeno ma. Ti waştişê ma nîno qebul kerdene. Kapasîteya odayan seba 16 kesan a, labelê ma 32 kesî manenî.”

Hepsîyan sere de avûkat, parlamenter û pawitoxê heqê merdiman ra û raya pêroyî ra hesasîyet waşt û dîyar kerdî ke ganî zîndan zîyaret bikerî.

XARPÊT

Neheqîyê ke hepsîyanê Xarpêtî ser o benî zî her ke şono zêde benî. Keyeyan dîyar kerd ke hepsîyî seba ke îdareyê zîndanî hişyar bikerî, 3 rojî kewtî girevê vêşanîye, labelê hepsîyê ke kewtî grevî erzîyayî hucreyan. Goreyê vatişê keyeyan; bi hawayo kêfî odayê hepsîyan yeno bedilnayene û destûr nêdîyeno ke hepsîyî kel-melanê xo bigîrî. Reyna telefonê hepsîyan ameyo birnayene û destûr nêdîyeno aktîvîteyanê sosyalan. Keyeyan dayo zanayene ke hepsîyan waştişnameyî dayî, labelê cewab nêdîyayo hepsîyan û seba hesasîyetî veng dayî raya pêroyî.

STENBOL

Xebatkaranê rojnameyê Ozgurlukçu Demokrasî ke bi KHKyî amebi padayene, Pinar Tarlaka ke tehlîye bîye, wina va: “Hepsîya bi nameyê Şîvekar Ateşe ke nêweşîya ci ya qelbî esta, ganî 20 rojan de reyêk derzin bidîyo aye ro. Tarsus ra ardî û cezaya aye ya dîsîplînî ke ewja de girewtbî, tîya de erzîya pratîk. Helbuk ganî Şîvekare bêra tedawî kerdene. Reyna hepsîya nêweşe ya bîne zî Saîde Înança ke raya pêroyî de sey Hozan Canê yena zanayene ya. Ganî her di zî bêrî tedawî kerdene.”