Komeleya Heqanê Merdiman û Înîsîyatîfê Azadîye yê Tepişteyanê  Nêweşan Anqara û Îstanbul de semedê tepişteyanê nêweşan ameyî pêser.

Çalakîya Îstanbulî ke wekîlê HDPyî yê Îstanbulî Musa Piroglu û hunermend Nure Surer zî tewrê ci bîyî bi weslîleya 8ê Adare bale ameye antene tepişteyanê cinîyanê ke nêweşê giran ê ser. Eşkerayîye de ame vatene ke goreyê doneyanê parî 13 hezar 33 tepişteyê nêweşî estê. Hûmara cinîyan 110 a înan ra 50 cinîyî nêweşê giran ê. Goreyê naye tayî cinîyê ke rewşa înan zaf giran a nameyê înan wina yo: Siti Goren, Gulîstan Abdo, Dicle Bozan û Fatma Ozbay.

Anqara de zî bi hewam waştişî çalakîyêke ameye kerdene. Eşkerayîye ame vatene ke problemo tewr gird ê welatî babetê tepişteyanê nêweşan a û  bale ameye antene serê rewşa Engîn Aydinalpo ke Zîndanê Bafra yê Samsunî de yo. Eşkerayîye de mergê tepişteya nêweşe Aysel Koç a ke Zîndanê Zîncanî de xo kişt ame vîrfînayene û ame vatene ke nê mergî de berpirsîyarîya îdareyê zîndanî esta û do teqîpkarê ci bê.