Hepsîyê ke zîndananê Bayburt û Tarsusî de yê hetê rejîmê AKPyî ra îşkence vînenî. Hepsîyan da zanayene ke ê şîddet vînenî, werdê înan de lulikî vejîyenê û hepsîyê nêweşî nînê derman kerdene.

BAYBURT

Hepsîyanê Zîndanê Bayburtî ra Berîvan Bayindire bi rayîrê keyeyê xo daye eşnawitene ke ê zaf tengayî ancenî û wina domnaye: “Werdo ke ma rê yeno, mîyanê ci de lulikî vejîyenî. Ma cigerayîşê rûtî ra ravêrenê. Nişka erzenê koguşanê ma ser û ma rê nengan çînenî û heqaret kenî. Reyna heqê telefonîya pîya peroyê heqê ma yê bingeyî gîrîyenê binê lingan û embazê ma yê ke nêweş î, nêweşxaneyî rê sewq nêbenî.”

TARSUS

Zîndanê Tarsusî ra zî tepişteyêko newe tehlîye bîyo û nêwaşt nameyê xo bido, derheqê îxlalkerdişê heqanê hepsîyan de nê vatî: “Embazê ma Remzî Akyurek û Suncan Gedîk seba wedarnayîşê tecrîdî û vera îxlalkerdişê heqanê hepsîyan de girevê veşanîye de yê. Embazê ma yê bînî zî paştî danî înan. Bi waştişê vetişê provokasyonî çeteyanê DAÎŞî û cemaatçîyana pîya ma vejenê cayê hewagirewtişî. Cezayê dîsîplînî çend şino zêdîyenê. Seba wayîrvejîyayîşê heqanê xo waştişnameyê ke ma danî, gardîyanî destûr nêdanî biresî ca û xo ra ê ke resenî destê selahîyetdaran ê zî bêcewab manenî.”