Tirkîya de nika 6 Zîndanê bi Tîpê Syî est ê û wina pawîyeno ke êyê neweyî bivirazîyê. Avûkate û Endama Komeleya Huqûqnasan a Seba Aadîye Destîna Yildiz derheqê kerdişanê Zîndananê bi Tîpê Syî de agahî daye.

Destîna Yildiz pare kerd ke zîndanê bi tîpê Syî hetê fîzîkî ra manenê zîndananê bi tîpê Fyî, wird zîndanî zî seba tecrîdî ronîyayê û vat: ''Muwekîlanê mi vat ke zîndanê bi tîpê Syî hîrê qetî yê, her qat de hucreyê yewkesî est ê, nê hucreyan de cayê hewagirewtişî çin o. Cêr de zî 7 huceyê hîrêkesî est ê. Rewşa fîzîkî ya hucreyanê hîrê kesî yê qata bine tîpê Fyî ra cîya yê. Salona sporî zî tîpê Fyî ra cîya ya. Warê sporî mîyanê dêsan de yo.''

Yildize vist vîrî ke Wezîrîya Edaletî menga çeleyî de agahîye daye û pare kerd ke 2023 de 20 zîndanê neweyî do virazîyê la derheqê nê zîndanan de polîtîkayêka nedîyare yena caardene. Yildize vat: ''Zîndanê Bi Asayîşê Berzî yê Tipê S û Yyî awan benê. Heta ke awankerdişê zîndanî nêqedê tîpê nînan do nêrê eşkerakerdene. Wezîrîye na babete de polîtîkayêka têmîyane kena.''

Destîna Yildiz îfade kerd ke wextê muracatê muwekîlanê xo de aye dîya ke sewqê seba zîndananê S û Fyî zêdîyayê û Zîndanê Syî de tepişteyê ke cezaya muebeda girankerde girewta, cabenê ke no zî yeno manaya tecrîdê hîna girankerdeyî.

Yildize ard ziwan ke Zîndanê bi Tîpê Syî di serrî verî ronîyayê coka îdareyê înan hema nêameyê roniştene. Yildize vat: ''Muwekîlanê mi vat ke seba roniştişê îdareyî xîret yeno kerdene ke tewirêko xurt bêro mojnayene. Profîlê tepişteyan vurîyenê. Ma Zîndanê bi Tîpê Syî yê Antalya de dî ke hûmara tepişteyanê sîyasîyan goreyê tepişteyanê edlîyan hîna zaf a. Wexto ke ez şîya Zîndanê bi Tîpê Syî yê Bodrumî surgunan newe dest pêkerdbi. Hûmara tepişteyanê edlîyan zêde bîye. Tay zîndanê bi Tîpê Syî est ê ke do newe virazîyê. Nê zîndanan de cayê nefesgirewtişî çin o û tede tecrîdo mutleq yeno ferzkerdene.''