Tepişteyo sîyasî Bûrhan Şikî bi mektuba ‚‘‘Keso ke vengê  merdimanê ke Zîndanê Patnosî yê Tîpê L’yî de yê, bieşnawo esto?‘‘  bale atne serê  rewşa xirabe ya ke tede yê.

Bûrhan Şikî Zîndanê Patnosî sey Kampa Nazîyan name kerd û nê vatî: ‘‘Ma zîndan de raştê caardişanê teberê merdimîye yenê. Bitaybetî zî Ahmet Erguno ke sey Mudirê 1’ine sereko tîya yo, bi tewirêkê dişmenkî îşkence kerdo meşru. Heme heqê ma yê bingeyênî yenê binpaykerdene. Tîya asayîşê ganê ma binê tehluke de yo.Problememanê ma ra tayî wina yê:

Heqê ma yê girewtişê xebere yeno xespkerdene, serrêk o rojname nêkeweno Zîndanê Patnosî.

Heme radyoyê ma ameyî destsernayene û semedê înan cezaya disîplînî ameye dayene.

Nêweşî nênê dermankerdene û mergî rê yenê terkkerdene.

Wareyo hempar û aktîvîteyî bi qerarê keyfî yê îdareyî ameyî wedartene.

Odayanê ma ra xeylî maylzemeyê ma ameyî destsernayene û ameyî berdene bi depoyan.

Her roje sey sereştişî yenê odayanê ma û binê nameyê humartiş û cigêrayîşî de odayanê ma ser bin kenê û ma rê heqeret kenê.

Reyna merdimê ma yê ke yenê ma vînenê yê zî raştê zextî yenê. Cigêrayîşê teberê merdimîye ra ravêrenê û yenê tehdîtkerdene.

Çirre ra awa kanalîzasyonî yena. Xora awa germine ma nêvînenê.

Odayan de 15-20-30 kesî pîya manenê la wexto ke ma wazenê fotografêk vejê, vanê tena 3 kesî eşkenê pîya vejî. Kantîn ra çîyo ke ma wazenê nêane û çîyo ke merdimê ma anê naye zî ma nêdanê erzenê depoyan.

Grûbêka gardîyanan ke îşkenceyî ra keyfweş bena ameya pêardene. Gama ke ma mudiran rê gerreyê înan kenê, ê ma  ra vanî, ‘ma zî nêeşkenê înan kontrol bikerê.‘

Bi keyfî cezayê disîplînî yenê dayene û waştişê ma yê bedilnayîşê odayan zî nênê caardene.

Seba ke nê caardişê teberê merdimîye biqedîyê, ma tîya ra veng danê heme rojname, nuştox, roşnvîr, TV, parlamenter, partî û dezgeh û sazgehê ke semedê pawitişê heqanê merdiman tê gêrenê û sazgehanê huqûqî yê ke vengê ma eşnawenê wa bibê hîsgêrî.‘‘