Zindanê Tarsusî de zilm û zextê dewlete

Şukran Aydogane ke serrêk Zindano Girewte yê Cinîyan yê Tarsusî de menda da zanayene ke aye qewimîyayîşê sey derbeya 12ê Êlule dîye.

Şukran Aydogane ke zîndanê Tarsusî de serrêk menda, derheqê îxlalkerdişê heqanê hepsîyan de qisey kerde.

Aydogane dîyar kerd ke hepsîyî binê hêrişê psîkolîjîkî de yê û wina domna: ‘‘Malzemeyê pakkerdişî nêdîyeno û her ca zaf xirabin o. Hepsîyî mîkrobî ra nêeşkenî nefes bîgerî. Malzemeyo ke danî zî bêsenînîye yo û o ke tayî mendo wextê şuxulnayîşê ci debo, ey danî. No semed ra boya nê malzemeyê pakkerdişî ra hepsîyî nêeşkenî nefes bigîrî û nêweş kewnî.

Aygodane vist vîrî ke zindanê Tarsusî tim bi xeberanê îşkenceyî rojdemî de yo û va: ‘‘ Xeberê ke derheqê nê zindanî de vejîyene, esasî de nînan ra dilab-hîrlab zafêr qewimîyayîşê giranî benî. Bi hêrîşo psîkolîjîk wazenê ke xoverdayîşê hepsîyan bişiknî. Wexto ke ma şîyêne mehkema rayîr de ma têşan verdayêne. Kogûşan de zî  ge-ge awa ma çamûrin ameyêne. ‘‘

Şukran Aydogane qiseykerdişê  xo wina qedîna: ‘‘Bi sebebo ke hepsîyî cîgêrayîşo rût redkerdêne, cezaya hucreyan diyayêne ci. Mayeka 70 serrî no semed ra erzîyayî hucre.  Tahlîyeya xeylî embazanê ma bi keyfî ameyî dergkerdêne. Tepişteyê nêweşî derman nêbenî û nêweşîya  înan îhmalî ra hîna xidar bena. Çîyekê wextê derbeya 12ê Êlule de bîyî, ewro zîndanan de reyna yene kerdene.‘‘