Zîndanê Yozgatî de 5 tepişteyê sîyasîyî hêverî raştê îşkenceyê gardîyanan ameyî dima zî hucreyê yewkesî de ameyî cakerdene. Nê tepişteyan ra Şîrîn Gezenî derheqê îşkence û kerdişanê xiraban de pê telefonî keyeyê xo rê qisey kerd.

Gezenî da zanayene ke 25 gardîyanan şewe eşto hucreyê înan ser, tepişteyî vetê korîdoran, hucre serûbin kerdo. Gezenî pare kerd ke gardîyanan pey ra destê înan kelemçe kerdê, nêngî çînayê û îşkenceyê tepişteyan kerdo. Îşkenceyî ra dima zî panc tepişteyî erzîyayî hucreyê yewkesî.

Keyeyê Gezenî îşkenceyî ser o muracatê OHDyî yê Anqara kerdo. Avûkatanê OHDyî ra Kenan Maçoglu seba ke tepişteyan de pêvînayîş bikero şi zîndanî. 

Maçogluyî dîyar kerd ke tepişteyan îşkenceyî ser o agahîyî dayê ci. Maçogluyî dima waşt ke mudirê zîndanî de pêvînayîş bikero la bi bahaneya 'mudir zîndan de nîyo' waştişê ey nêame caardene. Maçogluyî pê hesna ke înan derheqê tepişteyan de îdareyê zîndanî tehqîqat dayo destpêkerdene.