6ê teşrîna peyêne de dewa Enhîla ya qezaya Mîdyadî de Gevrîye Akguço 92 serre hetê kesanê nenasan ra amebi qetilkerdene. Derheqê serebûtî de 12 kesî ameyî destbendkerdene la pêroyî zî vera dîyayî.

Hemserekê HDPyî yê Mîdyadî Zubeyîr Erîkî derheqê babete de ANFyî rê qisey kerd. Erîkî da zanayene ke Gevrîye Akguç teberê welatî ra agêrabî dewa xo û vat: ''Ma wexto ke şîyî serweşîye keyeyê ey ra çew çin bi. Ma nêzanenê ke çi qewimîyeno. Cînayetî ra dima qoricîyan ra heta ciwananê dewe xeylêk kesî ameybî destbendkerdene la pêroyî vera dîyayî. Şar wazeno ke wa kiştoxî bêrê dîyene û cezakerdene. La şar bi edaletî zî bawer nêkeno.''

Erîkî ard ziwan ke ê sey HEDEPî babete teqîb kenê û vat: ''Kênayêka suryanî ya ciwane seba ke bixebita ameya dewe û ciwanêko ke keyeyê ci qoricî yo ey de têkilîye viraşte.  Na rewşe dewe de alozîye veta. Gevrîye Akguçî vera ney tewir mojna û waşto ke wa dewe de çîyo winayên nêbo. Hetê bînî ra tay kesî merdimanê sûryanîyan herême de nêwazenê. Gevrîye Akguçî verê cû mehkeme de seba erdê sûryanîyan zî şahîdîye kerdbî. Ma wina vanê qey nê serebûtan o kerdo hedef. Mîdyad herêma sûryanîyan a. Ma do agahîyanê ke kewenê destê ma pare bikerê. Şar zî pê ma bawer keno ke destê ma ra çi bêro ma do bikerê.''