1’ê Gulane Parîs adirî ser o yo!
Fransa de wextêk wina de ke boya cimatî zede bîya tenge, sendîkay, partîyê sîyasîyî, Yelegzerdî, dormepawitoxî, anarşîstî û organîzasyonanê ke zafaneyê cimatî temsil kenê xo veradayî kuçeyan.
Parîso ke tede bi mengan o çalakîyê Yelegzerdan dewam kenê, 1’ê Gulane bi boytengîya cimatî dest pêkerd.
Hukmatî reyna bi tedbîranê qedexekaran cewab da çalakîyanê 1’ê Gulane. Xeylî bajaran de viraştişê çalakî ame qedexekerdene. Lyon Caen, Haute-Garonne de seba tayê saetan qedexe ame ronayene.
Tena Parîs de 7.400 polîs û cendirmeyî ameyî wezîfedarkerdene. Yeno vatene Parîs de heta nika xeylî kesî ameyê destbendkerdene. Par, gama rayraşîyayîşê 1’ê Gulane de aktîvîstanê Black Blocsî Parîs de McDonalds dabi verê molotofan.
Pêroyîya welatî de sendîkawanan seyan cayan de organîzasyonê çalakîye kerd. Goreyê Wezaretê Karanê Zereyî yê Fransa do 115 hezar kesî vejîyê kuçeyan, Parîs de tena do 25-35 hezar kesî tewrê çalakîyan bibê.
