Serekê DYA’yî Donald Trumpî, eşkeraya ke 20 Çele kerdibi de vatbi, “Ma vera gruba DAÎŞ’î ser kewtê, wextê agêrayîşê keyeyî ame, heme ciwanê ma do biagêrayêne keye û hema do biagêrê.” No qeraro ke zereyê welatî de bibi semedê zaf munaqeşeyanê wişkan, sere de şefê Pentagonî û elçîyê DYA’yî yo ke koalîsyonê mîyanneteweyîyê vera DAÎŞ’î de ca gêno reyde zaf kesan îstîfayê xo daybî.

Dimayê di mengan, eksê nê eşkerayan de eşkerayîyêka bine ameye dayene. Verxatoxê  rayberîya Amerîka Sarah Sandersî eşkerayêk daye û vat, “seba wextêk” Surîye de 200 eskerî do bimanê. Sandersî vat ke na gruba qije seba “pawitişê haştîye” uca yena mendene. Bale yeno antene  ke na eşkerayî dimayê pêvînayîşê telefonî yê mabênê serekê DYA’yî Donald Trumpî û serekkomarê Tirkî Erdoganî ra ame kerdene.

Sere de Fransa û hemparê DYA’yî yê rojawanî yê koalîsyonî reaksîyon daybî qerarê apeydeancîyayîşî. Serekwezîra Almanya Angela Merkele, eşkeraya ke hewteyê verê cû daybî de persaybî û vatbi, “Bi şeklêko lezkanî û nişka Sûrîye ra ancîyayîşê amerikanijan fikrêko baş o?” Goreyê Merkele apeydeancîyayîş Rusya teba Îranî yê ke dişmenê Washingtonî yê tesîrê ci do bikero hêzdar.

Washington zî seba ke vakûr-rojkewtena Sûrîye de asayîş binê kontrolî de bo, pêşkêşê awankerdişê “hêzê muşahedeyî” kerd. Labelê no pêşkêş sere de hetê Parîs û Berlînî ra û endamanê bînan ê koalîsyonî ra ame redkerdene.