Herêma Essexî ya rojakewtena Londra ya Îngilîstanî de zereyê kamyonêk de 39 cenazeyî ameyî dîyene. Polîsanê Îngilîstanî da zanayene  ke kamyone Bulgarîstanî ra ameye û 19'ê Teşrîna Verêne de verê rojakewtene yê lîmanê Holyheadî ra dekewte Îngilîstan.

Ramitoxê kamyone yo Îrlandayij (25) ame destbendkerdene. Şefê polîsî Andrew Marînerî vat, "Ma kenê ke nasnameyê qurbanîyan eşkera bikê la goreyê mi no proses bibo derg." Marînerî îfade kerd ke tahqîqat dewam keno.

Goreyê serwîsanê lezabezî cenazayan ra 38'ê înan aîdê serrpîlan ê, yewê înan zî doman o. Wezîr Brandon Lewîsî twîtter ser o vat ke no trajedî yo û keyeyan û dostanê cenazeyan rê serweşîye waşte. Wezîrî vat, "Polîsî cehd kenê ke berpirsîyarî bêrê dîyene û hukmkerdene."