Îran û Rojakewtena Kurdistanî de 19’ê Adare ra nata varanî dest pêkerd û bêmabên mengêk vara. No varayîşo zêde bi sebebê weriştişê laserî û wextêkê kilmî de agêra zirarêkê xozayî, 25 eyaletanê Îranî ser o tesîr kerd. Seyan bajar û bajarekan de û bi hezaran dewan de laser werişt û bi desan kesan cuya xo vînî kerde. Bi des hezaran keyeyî û kargehî zî raşîyayî û kewtî verê laserî. 2 bajarî, bi desan dewî, qeza û bajarekî binê awe de mendî. Bi se hezaran kesî keye û wareyê xo ra bîyî û koçberîye dir têrî mendî. Bi mîlyonan dolaran ziraro madî virazîya.

Merkezê Krîzî Bîlanço Eşkera Kerd

Merkezê Krîzî yê Îranî derheqê zirarê xozayî yê giranî de dimayê mengêk ra bilanço eşkera kerd. Goreyê hayîdarîyanê ke Merkezî pare kerdî, rîyê laserî ra zirarêko pîl 235 bajar û bajarekan de û 4304 dewan de virazîya. 78 kesan cuya xo vînî kerde. Bi hezaran kesî birîndar bîyî. 400 hezar merdimî neçar mendî ke keyeyê xo terk bikerê û cayanê bînan de bica bibê. 40 hezar keyeyan zirar dî û 41 hezarî keyeyî zî raşîyayî.