Vervatoxê Wezaretê Karanê Teberî yê Îranî Abbas Mûsavîyî verba plansazîya 12 çimeyanê tahqîqatî yê cayanê ke dewleta Tirkî îşxal kerdî, tewir mojna.Mûsavîyî televîzyonê dewlete de qisey kerd û vat; "Ma verba nê de yê ke Enqere Sûrîye de garnîzonan saz

bike. Mesele ganî bi rayîranê dîplomatîkan çare bibe. Ganî yewîya Sûrîye rê hûrmet bêro mojnayene."

Rûsya Peymana Edene Arde Rojdem

Wezîrê Karanê Teberî yê Rûsya Sergey Lavrovî Moskowa de kombîyayîşêkê çapemenîye de peymana Edene arde rojdem.  Lavrovî vat, "Helbet ganî mabênê Tirkîya û Komara Erebî ya Sûrîye de dîyalog bêro dayene. Nê şertan de ma zî amade yê ke bi rolê hetkarîye ra bibê û seba têkilîye teşwîq bikê. Ganî dîyalogê mabênê Enqere û Şamî verê xo bide Peymana Edene ya ke Şam û Enqere serra 1998 de îmza kerdibi. Peynî de beno ke hetê têkilîye hewce bikê ke peymane zelal bike yan zî tayê çîyan bivurnê.  Eke nê çîyî bêrê qebulkerdene, no bibe qerarê înan û o çax ma zî do qebul bikê û paşt bidê ci.  Ganî mabênê hêzanê Kurdan û Şamî de dîyalog bibo. Rûsya ama de ya ke dîyalogêko winasên rê paşt bide. Herdi hetî zî vanê ke wazenê Rûsya nê proses de înan rê hetkarîye bike."