Îranî de serewedaritişê şarî yo ke vera vayê benzînî roja îneyî dest pêkerd û dima pêroyê eyaletanê Îranî de vila bi, resa Rojhelatê Kurdîstanî zî. Gore tay çimeyan hêrişanê rejîmî de bi desan kesî, gore tay kesan zî bi seyan kesî merdî.

Beyanatê Neteweyanê Yewbîyayeyan de ame parekerdene ke ê biqesawet ê ke serewedartişî de heta nika bi desan kesî merdî. Verfekê Komîserê Berz ê Heqanê Merdiman ê Neteweyanê Yewbîyayeyan Rupert Colvilleyî vat ê seba serebûtan rewşa alarmî de yê. Colvilleyî ard ziwan ke vera nawnayîşkeran fîşekê rastikênî yenê xebitnayene û vat: "Beno ke bi desan kesî ameyî kiştene." Colvilleyî îfade kerd ke hêzanê rejîmî hezar kesî tepiştî û venga Îdareyê Îranî û hêzanê asayîşî da ke vera nawnayîşkeran hêzê giran nêro xebitnayene. Colvilleyî nawnayîşkeran ra zî waşt ke nawnayîşanê xo bi hawayêkê haştîyane bikê.

Rêxistina Efû: Mabênê 100 û 200î De Kesî Ameyî Kiştene

Gore Rêxistina Efû ya Mîyanneteweyî zî hêrişanê vera waştişanê geqdaran de zaf kesan wefat ekrd. gore Rêxistina Efûyî mabênê 100 û 200î de kesî hetê hêzanê rejîmî ra ameyî kiştene. Ame mojnayene ke nawnayîşkerî bi hawayêkê haştîyane çalakîyan kenê. Beyanatê Rêxistina Efû de ame îfadekerdene ke gore xeberanê înan ê ke çimeyanê ci ra bawer ê tewr tay 106 kesan wefat kerd. Ame vatene ke na hûmare têna gore zanayîşanê 21 şaristanan ameye amadekerdene.

Gore Rejîmî Êyê ke Merdî Hêzê Asayîşî yê

Gore xeberanê medyaya Îranî yê ke çimeyanê fermîyan ra girewtî mîyanê 4 rojanê vîyarteyan de serewedaritişê şarî de têna 5 kesî merdî. Ame îdîakerdene ke 3 kesê ke wefat kerd zî wezîfedarê asayîşî bîyî. Zaf cayanê paytext Îranî de hûmarêka zêde hêzê asayîşî ameyî sewqkerdene. Tehranî de rojanê peyênan de nawnayîşî bîyî zêde.