Nawnayîşê Îranî yê ke vayê benzînî ya se ra 300 ra dima dest pêkerd hema zî dewam kenê. Çalakîyan 31 eyalet û 1100 merkezanê Îranî de vila bîyî. Rejîmê Îranî reya verêne seba ke verê çalakîyan bigêro û rayaumûmîya mîyanneteweyî çalakîyan ra dûrî bigêro şanê şemeyî înternet birna. La reyna zî zaf medyayan de ca girewt ke hêrişanê hêzanê çekdaran ê rejîmî de zaf kesî ameyî kiştene.

Gore Xeberan 100 yan zî 250 Kesî Ameyî Kiştene

Gore Radyoyê Ferda yo ke Pragî ra weşan keno eyaletê Huzîstanî de 58 kesî ameyî kiştene û Rojhelatê Kurdîstanî de zî 39 kesî ameyî kiştene. Herêma Kirmanşanî ya Rojhelatî de 23 eyaletê Sinê de 11, Urmîye de zî 5 kesî merdî. Eyaletan3e Fars, Îsfaxan, Kerman, Tehran, Elbrûz û Azerbaycane de zî zaf kesî ameyî kiştene. Yeno vatene ke heta nika 128 kesî ameyî kiştene. Rêxistina Mîyaneneteweyî yê Êfûyî zî vat 100î ra zêdêr kesî ameyî kiştene. Gore Mucahîdanê Şarî yê Surgunkerdeyan zî 251 kesî ameyî kiştene, 3700 kesî zî birîndar bîyî û 7 hezar kesî zî ameyî destbendkerdene. Mucahîdanê Şarî lîsteya 85 çalakîkeranê ke ameyî kiştene vila kerdî. Serekê Merkezê Cigêrayîşanê Stratejîkan ê Îranî û Şewirmendê Serekkomarê Iraqî Husameddîn Aşnayî hesabê xo yê medyaya komelkî ser o pare kerd ke nawnayîşê Îranî manenê operasyonê Furugî Cavîdan o ke şerê Îran û Iraqî ra dima Mucahîdanê Şarî dabi destpêkerdene û  vat ke o çax dima ke serewedaritişê Mucahîdanê Şarî amebi vindarnayene bi operasyonê ''Mersad 2'' zaf kesî amebî dardekerdene. Aşnayî bi nê hawayî mojna ke beno ke newe ra dardekerdişê keyfî bêrê kerdene. Rojnameyê Keyhanî yo ke pabesteyê Humeynî yo, bi xeberêka xo ya maşetî tesdîq kerd ke seba dardekerdişan amadekarîye yena kerdene.