Parlamentoyê Îtalya de raydayîşî de pêşnameyê naskerdişê qirkerdişê Armenîyan ame qebûlkerdene. Hetê bînî ra Serekkomarê Fransa Emmanuel Macronî zî 24'ê Nîsane sey roja vîrardişî îlan kerde.
Îtalya qirkerdişê Armenîyan nas kerd û Fransa zî 24'ê Nîsane 1915’ê Qirkerdişê Armenîyan sey rojêka vîrardişî ya komare îlan kerde.
Îtalya de raydayîşê roja Çarşeme de 382 wekîlan rayê ‘e-ya’ yî seba naskerdişê qirkerdişê Armenîyan dayî, 43 wekîlî zî bêhet mendî. Kesan ê ke verê ci rayî dayî, nêbî. Dimayê raydayîşî heme wekîlî weriştî serê payan û seba qerarê çepikî kuwayî.
Serekkomarê Fransa Emmanuel Macronî zî morê xo da binê qerarnameyê 24'ê Nîsane 1915’ê Qirkerdişê Armenîyan û sey rojêka vîrardişî ya komare îlan kerde.
Macronî verê cû bi eşkerayîyêk soz dabi ke 24'ê Nîsane biko “Roja Vîrardişî ya Qirkerdişê Armenîyan a Neteweyîye“. 24'ê Nîsane roja komkiştişê Jon Tirkan ê vera roşnvîranê Armenîyan ê Stembolî temsîl keno.
Macronî vernîya wextêkê kilmî eşkerayîyêk dayebî û dabi zanayene, babeta têkoşînê vera DAÎŞ'î, azadîyê bingeyênî, qirkerdiş û vîyarte, heqê merdiman de ê û Tirkîya têsere nêkenê û vatibi, “Seba hewcadarîya vîyarteyê prosesê sîyasî yê Sûrîye, babeta dîyalogî de zî amancê ma yê hemparî estê. Seba naye zî Tirkîya reyde dîyalog nêbo nêbeno.”
